ԵՐԵՎԱՆ, 3 հոկտեմբերի./Նովոստի–Արմենիա/. Ռուսաստանը Հայաստանի ժողովրդին եղբայրական է համարում, բայց Մոսկվան հարցեր ունի այս երկրի ղեկավարությանը, լրագրողներին ասել է ՌԴ նախագահի մամուլի քարտուղար Դմիտրի Պեսկովը։
Նա այսպես է մեկնաբանել Երևանի որոշումը՝ վավերացնել Միջազգային քրեական դատարանի Հռոմի կանոնադրությունը, հաղորդում է ՏԱՍՍ–ը։
«Հայաստանը մեզ բարեկամ պետություն է, մեր գործընկերը։ Եվ, իհարկե, մեզ շատ բան է կապում եղբայրական հայ ժողովրդի հետ։ Եվ մենք չենք կասկածում, որ այդ ամենը մեզ ընդմիշտ կմիավորի։ Բայց միևնույն ժամանակ, մենք լրացուցիչ հարցեր կունենանք Հայաստանի գործող ղեկավարությանը։ Դրանք նախօրոք փոխանցվել են հայկական կողմին», – նշել է Կրեմլի ներկայացուցիչը։
Կրեմլը Հայաստանի կողմից Հռոմի ստատուտի վավերացումը համարում է ոչ կոռեկտ քայլ երկկողմ հարաբերությունների տեսանկյունից, նշել է Պեսկովը։
«Կասկածել և ի սկզբանե կասկածել ենք, որ երկկողմ հարաբերությունների տեսանկյունից Հայաստանի միացումը Միջազգային քրեական դատարանի Հռոմի կանոնադրությանը կոռեկտ է։ Մենք դեռ կարծում ենք, որ դա ոչ կոռեկտ որոշում է»,- նշել է նա։
Ավելի վաղ, Սահմանադրական դատարանը սահմանադրությանը համապատասխանող էր ճանաչել 1998 թվականի հուլիսի 17-ին ստորագրված՝ Միջազգային քրեական դատարանի Հռոմի կանոնադրությունում ամրագրված պարտավորությունները։ 2022 թվականին այս հարցով Սահմանադրական դատարան է դիմել Կառավարությունը։ Ավելի ուշ, գործադիր մարմինը Միջազգային քրեական դատարանի Հռոմի կանոնադրությունն (Հռոմի ստատուտ) ուղարկել էր Ազգային ժողով՝ վավերացման:
Միջազգային քրեական դատարանը 2023 թվականին ՌԴ նախագահ Վլադիմիր Պուտինին ձերբակալելու միջազգային օրդեր է տվել, ինչը ենթադրում է, որ Հռոմի ստատուտը վավերացրած երկրները պետք է ձերբակալեն ՌԴ նախագահին, եթե նա այցելի այդ երկրներ։ Ռուսաստանի ԱԳՆ-ն բողոքի նոտա է հղել՝ Հայաստանի կառավարության կողմից Հռոմի ստատուտը ԱԺ-ի վավերացմանն ուղարկելու առնչությամբ։
Նախորդ շաբաթ ՌԴ ԱԳՆ–ից հայտարարել էին, որ Հայաստանի կողմից Հռոմի ստատուտի վավերացումը «ամենաբացասական հետևանքները կունենա երկկողմ հարաբերությունների համար։–0–
