Թուրքիայի նախագահն արձագանքել է Հայոց ցեղասպանությունը ճանաչելու ԱՄՆ–ի հնարավոր պլաններին

ԵՐԵՎԱՆ, 23 ապրիլի./Նովոստի–Արմենիա/. Թուրքիան շարունակում է պաշտպանել իր դիրքորոշումն Օսմանյան կայսրությունում Հայոց ցեղասպանության հարցում։ Այս մասին ասվում է Թուրքիայի նախագահ Ռեջեփ Թայիպ Էրդողանի աշխատակազմի հաղորդագրության մեջ, որը հրապարակվել է նախօրեին Անկարայում կայացած բարձրագույն խորհրդատվական խորհրդի նիստի արդյունքում, գրում է ՏԱՍՍ–ը։ 

«Պարոն նախագահը տեղեկացրեց, որ Թուրքիան շարունակելու է պաշտպանել ճշմարտությունը նրանցից, ովքեր ստում են այսպես կոչված Հայոց ցեղասպանության մասին և աջակցում են զրպարտությանը քաղաքական պատճառներով», – նշվում է հաղորդագրության մեջ։

Էրդողանը նախագահել է բարձրագույն խորհրդատվական խորհրդի նիստին։

Ավելի վաղ The Wall Street Journal թերթը, հղոմ անելով ամերիկյան վարչակազմի աղբյուրներին, հայտնել է, որ ԱՄՆ նախագահ Ջո Բայդենը նախատեսում է պաշտոնապես ճանաչել Հայոց ցեղասպանությունը։ Հրատարակության տվյալներով, ԱՄՆ նախագահն իր որոշման մասին պաշտոնապես կարող է հայտնել ապրիլի 24–ին, երբ Հայաստանը նշելու է Հայոց ցեղասպանության զոհերի հիշատակի օրը։ Թերթի աղբյուրներն ընդգծում են, որ Բայդենը կարող է սահմանափակվել ֆորմալ հայտարարությամբ, որում չի նշվի ցեղասպանության փաստի պաշտոնական ճանաչման մասին։–0–