ԵՐԵՎԱՆ, 16 նոյեմբերի./Նովոստի–Արմենիա/. Ռուսաստանի և Իրանի նախագահներ Վլադիմիր Պուտինն ու Սեյել Էբրահիմ Ռայիսին հեռախոսազրույց են ունեցել։ Այս մասին նշվում է Իրանի նախագահի պաշտոնական
կայքում։
Նշվում է, որ Ռայիսին ողջունել է Ռուսաստանի նախաձեռնությունն` ուղղված Կովկասյան տարածաշրջանում կայունության և խաղաղության ապահովմանը։ Հեռախոսազրույցի ընթացքում կողմերը նաև ընդգծել են, որ «աշխարհաքաղաքական վիճակի և տարածաշրջանի երկրների սահմանների ցանկացած փոփոխություն անթույլատրելի է»։
Մտահոգություն հայտնելով ղարաղաբաղյան հարցով` Պուտինը նշել է, որ «տարածաշրջանում վստահության և համագործակցության բարձրացման համար մենք ձգտում ենք գործարկել 3+3 խորհրդակցական մեխանիզմ, և մենք հույս ունենք, որ Իրանը կաջակցի դրան»։
ՊՆ–ի հաղորդմամբ, ժամը 17։00-ի դրությամբ իրադրությունը ՀՀ արևելյան սահմանագոտում, ուր այսօր հարձակում էին նախաձեռնել Ադրբեջանի ԶՈՒ ստորաբաժանումները, շարունակում է ծայրահեղ լարված մնալ։ Մարտերի ինտենսիվությունը չի թուլացել։ Հակառակորդը շարունակում է կիրառել հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Հայկական կողմի պատասխան գործողությունների արդյունքում հակառակորդն ունի անձնակազմի մեծաթիվ կորուստներ, զրահատեխնիկայի շուրջ մեկ տասնյակ միավոր ոչնչացվել կամ շարքից դուրս է բերվել։ Հայկական կողմը նույնպես կորուստներ ունի։ Տվյալները ճշտվում են։ ՀՀ ԶՈՒ 12 զինծառայող՝ 7 պայմանագրային և 5 ժամկետային գերեվարվել են։
Ավելի վաղ ՊՆ–ն հաղորդել էր, որ նոյեմբերի 16-ին, ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ ՀՀ ԶՈՒ ստորաբաժանումները դիմել են պատասխան գործողությունների՝ հակառակորդի առաջխաղացումը կանխելու նպատակով։
ՀՀ ԱԽ քարտուղար Արմեն Գրիգորյանը հայտնել է, որ Երևանը դիմել է Մոսկվային` կոչ անելով պաշտպանել Հայաստանի տարածքային ամբողջականությունը։
Նոր հարթակի գաղափարի մասին
Տարածաշրջանի վեց երկրների համագործակցության նոր հարթակի (այսպես կոչված «վեցի հարթակ» կամ «3+3» ձևաչափ) ստեղծման գաղափարով պաշտոնապես Անկարան հանդես է եկել 2020թ.–ի աշնանը արցախյան պատերազմի ավարտից անմիջապես հետո։ Այս նախաձեռնության մասին Թուրքիայի նախագահ Ռեջեփ Թայիպ Էրդողանն առաջին անգամ հայտարարել է նախորդ տարվա դեկտեմբերի 11–ին Բաքու կատարած այցի ժամանակ` անվանելով այն «Վեցի հարթակ»։
Հիմա հարթակի գործարկմանն ուղղված բանակցություններում ակտիվորեն ներգրավված է Մոսկվան։ ՌԴ ԱԳ նախարար Սերգեյ Լավրովի խոսքով, իրանական կողմը դրական է վերաբերվել այդ նախաձեռնությանը, ինչպես նաև Ադրբեջանն ու Թուրքիան, աշխատանքներ են ընթանում հայ գործընկերների հետ։ Մոսկվայում հույս ունեն, որ Վրաստանը ևս, չնայած բոլոր խնդիրներին, «կկարողանա իր արմատական հետաքրքրությունը տեսնել խորհրդակցությունների նման մեխանիզմի ստեղծման մեջ»։–0–
