ՌԴ դեսպանը մեկնաբանել է Պուտինի հայաստանյան այցի հնարավորությունը

ԵՐԵՎԱՆ, 11 սեպտեմբերի./Նովոստի–Արմենիա/. ՀՀ–ում ՌԴ արտակարգ և լիազոր դեսպան Սերգեյ Կոպիրկինը խոսեց ՌԴ նախագահ Վլադիմիր Պուտինի հայաստանյան հնարավոր այցի մասին։

Ի պատասխան լրագրողների այն հարցին, թե կարելի՞ է, արդյոք, ակնկալել, որ ՌԴ նախագահը հոկտեմբերին կայցելի Երևան` դեսպանը պատասխանեց. «Պետք է»։

«Դուք ունեք ա՞յլ տեղեկատվություն։ Ես այլ տեղեկատվություն չունեմ։ Մենք ելնում ենք այն փաստից, որ այստեղ անցկացվելու է Եվրասիական բարձրագույն խորհրդի նիստը։ Դա, ինչպես նշել է ՀՀ փոխարտգործնախարարը երեկ, կարծես, խորհրդարանում, պետությունների ղեկավարների ընդհանուր որոշումն էր», – ասաց Կոպիրկինը։

Պատասխանելով այն հարցին` կա՞, արդյոք, արդեն նման որոշում` դեսպանը հայտարարեց, որ գոյություն ունի որոշում հոկտեմբերին Հայաստանում Եվրասիական բարձրագույն տնտեսական խորհրդի նիստի անցկացման մասին։

«Որևէ այլ որոշում չի ընդունվել», – ավելացրեց Կոպիրկինը։

Հոկտեմբերի 1–ին Երևանում կանցկացվի ԵՏՄ բարձրագույն տնտեսական խորհրդի նիստը։ Ավելի վաղ ՀՀ ԱԳ փոխնախարար Շավարշ Քոչարյանը տեղեկացրել է, որ նիստի անցկացման որոշումը հաստատվել է բոլոր մասնակից երկրների, այդ թվում` Ռուսաստանի ղեկավարների կոնսենսուսի միջոցով։