ԵՐԵՎԱՆ, 26 հունվարի./Նովոստի–Արմենիա/. Ռուսաստանի, Հայաստանի և Ադրբեջանի փոխվարչապետերը հունվարի 27–ին նախատեսում են հանդիպում անցկացնել Մոսկվայում, որպեսզի քննարկեն Հարավային Կովկասում տրանսպորտային հանգույցների կառուցումը, ՌԲԿ–ին հայտնել է 2 աղբյուր` Ռուսաստանի և Հայաստանի կառավարություններում։ Ռուսական կողմից բանակցություններին կմասնակցի Ալեքսեյ Օվերչուկը, հայկական կողմից` Մհեր Գրիգորյանը, ադրբեջանական կողմից` Շահին Մուստաֆաևը, հայտնել է ռուսական դիվանագիտական աղբյուրը։
ՌԲԿ–ն հայցում է ուղարկել Օվերչուկի ներկայացուցչին, Հայաստանի և Ադրբեջանի կառավարություններին։
Կողմերը պայմանավորվել են ստեղծել նման բանակցային ձևաչափ հունվարի 11–ին` Արցախում ավարտված պատերազմից հետո երեք պետությունների ղեկավարների` ՌԴ նախագահ Վլադիմիր Պուտինի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի առաջին անձնական հանդիպման ժամանակ։ Ձևաչափի մասնակիցների գլխավոր խնդիրն է որոշել, թե ինչ է հարկավոր կառուցել կամ վերականգնել տարածաշրջանում տրանսպորային հաղորդակցությունները վերականգնելու համար։
Փոխվարչապետերը պետք է քննարկեն միանգամից մի քանի հնարավոր նախագիծ, մասնավորապես, երկաթգծի կառուցումը Հայաստանի տարածքով, որը կկապի Ադրբեջանն ու Նախիջևանը (ադրբեջանական անկլավ), ինչպես նաև Հայաստանն ու Ռուսաստանը։ Հիմա Նախիջևանի հետ կապվելու համար Ադրբեջանն ունի միայն ավիահաղորդակցություն։
Բաքուն կցանկանար հասնել նաև այնտեղ ավտոմոբիլային մայրուղու կառուցման, ՌԲԿ–ին ասել է ռուսական դիվանագիտական աղբյուրը։ Դրա փոխարեն Հայաստանը պետք է ստանա երկաթուղային կապ Ռուսաստանի հետ։Երկրները չունեն ուղիղ հաղորդակցություն, նախկինում այն իրականացվում էր Վրաստանի տարածքով, սակայն 2008թ.–ի պատերազմից հետո այդ հաղորդակցությունը դադարեցվեց։ Բացի այդ, փոխվարչապետերը կքննարկեն նաև Նախիջևանի տարածքով Հայաստանն ու Իրանը երկաթուղու միջոցով կապելու առաջարկը, նշել է ՌԲԿ–ի զրուցակիցը։
Ադրբեջանն արդեն սկսել է իր տարածքում երկաթգծի հատվածի կառուցումը։ Դեկտեմբերի վերջին Իլհամ Ալիևը նշել է, որ երկրին կպահանջվի առավելագույնը երկու տարի Հորադիզից դեպի Զանգելան ճյուղը կառուցելու համար։
Հունվարի 11–ին կայացած հանդիպման ժամանակ Ռուսաստանի, Հայաստանի և Ադրբեջանի առաջնորդները պայմանավորվել են, որ աշխատանքային խումբը պետք է մինչև մարտի 1–ը ներկայացնի նախագծերի իրականացման ցանկն ու ժամանակացույցը։–0–
