Պուտինի, Փաշինյանի և Ալիևի շփումները եռակողմ հայտարարության ստորագրման օրը նախատեսված չեն.Պեսկով

ԵՐԵՎԱՆ, 9 նոյեմբերի./Նովոստի–Արմենիա/. ՌԴ նախագահ Վլադիմիր Պուտինի, Ադրբեջանի առաջնորդ Իլհամ Ալիևի և ՀՀ վարչապետ Նիկոլ Փաշինյանի կոնտակտները նախատեսված չեն Արցախի հարցով եռակողմ հայտարարության ստորագրման 1–ամյակին։ Այս մասին այսօր լրագրողներին ասել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ–ը։

«Ինչ վերաբերում է Բաքվի և Երևանի հետ շփումներին, ապա Մոսկվայի հետ դա տեղի է ունենում տարբեր մակարդակներում և բացառապես կանոնավոր հիմքով։ Ինչ վերաբերում է շփմանը երեքով, մենք ձեզ կտեղեկացնենք, եթե նման պայմանավորվածություն ձեռք բերվի։ Հիմա որևէ կոնկրետ բան չկա», – նշել է ՌԴ նախագահի մամուլի քարտուղարը։

Պեսկովը երկուշաբթի լրագրողներին հայտնել է, որ Պուտինի, Ալիևի և Փաշինյանի տեսակապի հստակ ամսաթիվը որոշված չէ, բայց այդ ուղղությամբ աշխատանքն իրականացվում է։ Ավելի վաղ նա «Ինտերֆաքսին» հայտարարել է, որ այս շաբաթ նախատեսված է Ռուսաստանի, Ադրբեջանի և Հայաստանի առաջնորդների հանդիպումը։

Պեսկովը նաև հայտարարել է, որ Ռուսաստանի, Հայաստանի և Ադրբեջանի նոյեմբերի 9–ի եռակողմ հայտարարությունը չափազանց կարևոր է, դրա նշանակությունը դժվար է գերագնահատել։

«Մեկ տարվա վաղեմության փաստաթղթերը չափազանց կարևոր են, կարևոր են և Ադրբեջանի, և Հայաստանի համար` որպես փաստաթղթեր, որոնք թույլ են տվել դադարեցնել պատերազմն ու կանգնել տարածաշրջանային տնտեսության և ենթակառուցվածքի խաղաղ զարգացման ճանապարհին», – ասել է Կրեմլի ներկայացուցիչը` պատասխանելով մամուլի համապատասխան հարցին։

Նրա խոսքով, ռուս խաղաղապահները, ռուսական զորակազմը կատարում են իրենց գործառույթները տարածաշրջանում, ապահովում են անվտանգությունը, իրականացնում են հրադադարի ռեժիմի մոնիթորինգ, փախստականների վերադարձի գործընթացը։