ԵՐԵՎԱՆ, 2 դեկտեմբերի./Նովոստի–Արմենիա/. ՌԴ նախագահ Վլադիմիր Պուտինը հայտարարել է, որ Արցախի հարցով որոշումը մեծ, անձնական խիզախություն էր պահանջում ՀՀ վարչապետ Նիկոլ Փաշինյանից։ Նա կարծում է, որ անհրաժեշտ է աջակցել ՀՀ վարչապետին և նրա թիմին` երկրում խաղաղ կյանքի հաստատման համար։
Այսօր ելույթ ունենալով ՀԱՊԿ Հավաքական անվտանգության խորհրդի նստաշրջանին` Պուտինն ընդգծել է, որ «Հայաստանը, հայ ժողովուրդն իսկապես ապրեցին իրենց պատմության բավականին բարդ ժամանակաշրջան», Հայաստանի ղեկավարությունն ու վարչապետը ստիպված էին ընդունել «Հայաստանի ժողովրդի համար շատ բարդ, բայց անհրաժեշտ որոշումներ»։
«Պետք է ասեմ, որ այդ որոշումներն, իհարկե, ցավոտ են, սակայն ևս մեկ անգամ ընդգծեմ, որ դրանք անհրաժեշտ էին և վարչապետից պահանջում էին մեծ անձնական խիզախություն ։ Սա ակնհայտ է։ Այսօրվա խորհրդակցությանը ներկա գտնվող յուրաքանչյուր մարդ հասկանում է պատասխանատվության աստիճանը նմանատիպ որոշումների ընդունման համար։ Նա իր վրա է վերցրել այդ պատասխանատվությունը։ Եվ մեր խնդիրն է հիմա աջակցել վարչապետին և նրա թիմին` խաղաղ կյանք հաստատելու, բոլոր ընդունված որոշումների կատարմանը հասնելու և կյանքի դժվարին իրավիճակում հայտնված մարդկանց օգնելու համար», – հայտարարել է ՌԴ նախագահը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում