Փաշինյանը ներկայացրել է, թե ինչ է Հայաստանն առաջարկել Ադրբեջանին և կա, արդյոք, արձագանք (ՎԻԴԵՈ)

ԵՐԵՎԱՆ, 24 հունվարի./Նովոստի-Արմենիա/. ՀՀ վարչապետ Նիկոլ Փաշինյանը երկուշաբթի առցանց ասուլիսի ժամանակ պատասխանել է այն հարցին, թե սահմանների դեմարկացիայի և դելիմիտացիայի վերաբերյալ կոնկրետ ինչ առաջարկներ է Հայաստանը ներկայացրել Ռուսաստանին և Ադրբեջանին։

«Առաջարկները փոխանցել ենք ՌԴ-ի մեր գործընկերներին, ենթադրում եմ՝ ռուսական կողմն Ադրբեջանին էլ է փոխանցել, բայց մենք էլ նաև ուղիղ Ադրբեջանին ենք փոխանցել դրանք, և այն, որ այդպիսի առաջարկներ լինելու են, այդ մասին Ադրբեջանի նախագահին տեղեկացրել եմ Բրյուսելի հանդիպման ժամանակ: Առաջարկները ոչ թե հենց դեմարկացիայի մասին են, այլ հետևյալի՝ Բրյուսելում կողմերը պայմանավորվել են հայ-ադրբեջանական սահմանին կայունության և անվտանգության մակարդակը բարձրացնելու վեարբերյալ և գործը տանել դելիմիտացիայի և դեմարկացիայի երկկողմ հանձնաժողովի ձևավորմանը», - ասաց Փաշինյանը:

Նրա խոսքով, Հայաստանի առաջարկը վերաբերում է հենց անվտանգության միջոցառումներին, ինչի մեջ գլոբալ առումով ոչ մի գաղտնիք չկա։ Դրանք այն առաջարկներն են, որոնց մասին դեռ մայիսին են խոսել՝ հայելային հետքաշման մասին է խոսքը։

«Դա աշխատանքային փաստաթուղթ է, որի մասին մեր ռուսաստանցի, ադրբեջանցի և միջազգային գործընկերներին մենք տեղյակ ենք պահել», - ասաց Փաշինյանը:

Նա հայտարարեց, որ չի առաջարկվում սահմաններն առանց պահպանության թողնել: Դեմարկացիան և դելիմիտացիան հնարավոր չեն, երբ սահմանին կայունություն չունեն:

«Ադրբեջանի կողմից հրապարակային արձագանք կա, և կա հրապարակային պատասխան։ Ադրբեջանը, ըստ էության, հենց այդ առաջարկների փաթեթին էր արձագանքել՝ ասելով, որ դեմարկացիան և դելիմիտացիան պետք է առանց նախապայմանների տեղի ունենան, ինչին ի պատասխան ՀՀ ԱԳՆ-ն արձանագրեց, որ Հայաստանը որևէ նախապայման չունի, և խոսքը ոչ թե նախապայմանի, այլ պայմանավորվածությունները կյանքի կոչելու մեխանիզմների մասին է։ Հայաստանը, չի փորձել այնպիսի փաստաթուղթ ձևակերպել, որը զուտ հայկական կողմի տեսակետն արտահայտի, այլ փորձ է արվել քննարկումներից ռացիոնալ առաջարկները դուրս բերել և ձևակերպել փոխադարձ ընդունելի առաջարկ: Քննարկումները շարունակվում են, մենք չենք ուզում շատ դետալներ բացահայտելով՝ խաթարել աշխատանքային քննարկումը։ Կարծում ենք, որ դեմարկացիայի և դելիմիտացիայի հանձնաժողովն օր առաջ պետք է ձևավորվի՝ ինչքան շուտ, այդքան՝ լավ։ Այն պայմանավորվածությունները, որոնք ձեռք ենք բերել, ինչքան շուտ կատարվեն, այնքան լավ», - ասաց Փաշինյանը:

Ինչ վերաբերում է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի այն հայտարարությանը, որ Եվրամիությունն իրավիճակի լիցքաթափման մի քանի տարբերակներ է կողմերին առաջարկել, Փաշինյանը նկատեց, որ եղել են հանդիպումներ Սոչիում, հետո՝ Բրյուսելում:

«Դրանց արդյունքում փորձել ենք դուրս բերել էն հնարավոր ընդհանուր մոտեցումները, որոնք արձանագրվել են, և այն առաջարկը, որը արել ենք, որում հընթացս որոշակի նյուանսներ են փոխվել, ներառում են Սոչիի և Բրյուսելի քննարկումները։ Առաջարկը մենք ենք ձևակերպել, բայց դրանց հեղինակային իրավունքը մեզ չի պատկանում, որովհետև դա քննարկումների արդյունք է՝ նաև Ռուսաստանն է նկատառումներ արել, ավելին՝ դրանք արտահայտում են նաև Ադրբեջանի, Հայաստանի, ԵՄ-ի որոշակի դիտարկումներ», - ասաց Փաշինյանը:-0-