ԵՐԵՎԱՆ, 7 հունվարի./Նովոստի-Արմենիա/. Կովկասի ինստիտուտի տնօրեն, քաղաքագետ Ալեքսանդր Իսկանդարյանը մեկնաբանել է Հայաստանի ԶՈւ ստորաբաժանման Ղազախստան գործուղումը։
Այսօր ՀՀ զինված ուժերը ՀԱՊԿ խաղաղապահ ուժերի կազմում Ղազախստանի Հանրապետություն են
գործուղել խաղաղապահ ստորաբաժանում, թվով՝ 100 զինծառայող: Առաքելության ընթացքում ՀՀ ԶՈւ խաղաղապահ ստորաբաժանումը կիրականացնի բացառապես ռազմավարական նշանակության շենք-շինությունների և ենթակառուցվածքների պահպանության գործառույթներ:
«Այն, ինչ հիմա կատարվում է Ղազախստանում, սոցիալական բունտ է, որը վերածվել է քաղաքական և էլիտար պառակտման: Այս գործընթացը կարող է հանգեցնել զարգացման բարդ տարբերակների, ուստի Ռուսաստանը որոշեց ուշադրության կենտրոնում պահել իրավիճակը», - ասաց Իսկանդարյանը:
Նրա խոսքով՝ որոշումը կայացվել է Մոսկվայում՝ Ռուսաստանի և Ղազախստանի նախագահներ Վլադիմիր Պուտինի և Կասիմ-Ժոմարտ Տոկաևի հեռախոսազրույցի ժամանակ։ Նա նշեց, որ պատահականություն է այն, որ որոշումը հրապարակել է Հայաստանի վարչապետ Նիկոլ Փաշինյանը։ Պարզապես նա ներկայումս ՀԱՊԿ Հավաքական անվտանգության խորհրդի նախագահն է։
«Փաշինյանն այլ ելք չուներ, քանի որ անհրաժեշտ էր լոյալություն դրսևորել Ռուսաստանին և ՀԱՊԿ-ին։ Սա սիմվոլ է, նշան (զինծառայողներին գործուղելը, խմբգր.), և չարժե սրան վերաբերվել որպես լուրջ միջամտություն: Ինչ վերաբերում է Հայաստանում առաջացած դժգոհությանը, ապա ինձ թվում է, որ բուռն վրդովմունքը կապված է ներհայկական քաղաքական իրավիճակի հետ։ Փաշինյանին ընդդիմացողներն ամեն դեպքում նրան մեղադրում են»,- ասաց Իսկանդարյանը:
Загружается новость ... "Лево"
Քաղաքագետ, Կենտրոնական Ասիայի հարցերով փորձագետ Արկադի Դուբնովն իր հերթին «դրամատիկ որոշում» է անվանել ՀԱՊԿ զորքերի Ղազախստան ուղարկելը։
«Սա առաջին նախադեպն է ՀԱՊԿ-ի ողջ գոյության ընթացքում: Մենք գիտենք դեպքեր, երբ կազմակերպությունը հրաժարվել է արյունահեղության վտանգի և հնարավորությունների պատճառով»,- ասաց Դուբնովը։
Նա կասկածանքով վերաբերվեց Ղազախստանի նախագահի հայտարարությանը «արտաքին միջամտության» մասին, սակայն հնարավոր համարեց, որ Ալմաթիի դրաման կարող է լուրջ վտանգ ներկայացնել Ղազախստանի և ողջ հետխորհրդային տարածքի համար, ուստի այլ ելք կարող էր չլինել։
Ղազախստանում ստեղծված իրավիճակի մասին
Հունվարի սկզբից բողոքի զանգվածային ցույցեր սկսվեցին Ղազախստանում, Մանգիստաուսկի շրջանի երկու քաղաքների բնակիչներն իրենց բողոքն էին արտահայտում հեղուկ գազի գների կրկնակի թանկացման դեմ: Ալմաթիում հունվարի 4-ին և 5-ին տեղի ունեցան բախումներ ուժայինների հետ, ոստիկանությունը կիրառեց գազ և լուսաձայնային նռնակներ: Ղազախստանի տարածքում անջատվեց ինտերնետը, ժամանակավորապես դադարեցվեց մի շարք հեռուստաալիքների հեռարձակումը:
Հունվարի 5-ի գիշերը Ղազախստանի նախագահ Կասիմ-Ժոմարդ Տոկաևը արտակարգ իրավիճակի ռեժիմ մտցրեց մի շարք մարզերում, իսկ հետո նաև Ղազախստանի ամբողջ տարածքում: Հունվարի 5-ին Ղազախստանի կառավարությունը հրաժարական տվեց, Տոկաևը մեղադրեց նրանց նման իրավիճակի ստեղծման մեջ և գլխավորեց Անվտանգության խորհուրդը՝ այդ պաշտոնից հեռացնելով պետության առաջին ղեկավար Նուրսուլթան Նազարբաևին: Նույն օրը Տոկաևը դիմեց ՀԱՊԿ գործընկերներին՝ խնդրելով աջակցել ճգնաժամի պայմաններում: Հունվարի 6-ին Ղազախստան ուղարկվեցին ՀԱՊԿ հավաքական խաղաղապահ ուժերի զորակազմերը, որոնց կազմում ներառված են Ռուսաստանի, Բելառուսի, Հայաստանի, Տաջիկստանի և Ղրղըզստանի Զինված ուժերը:
Հունվարի 7-ին Ղազախստանի իշխանությունները հայտարարեցին ահաբեկչական վտանգի կրիտիկական՝ կարմիր մակարդակ ամբողջ հանրապետության տարածքում: Իրավապահ մարմինները ոչնչացրել են անկարգությունների 26 մասնակցի, ավելի քան 3 հազար մարդ ձերբակալվել է: ՆԳՆ-ի տվյալներով, անկարգությունների հետևանքով մահացել է 18 իրավապահ, տուժել է 748 ոստիկան և Ազգային գվարդիայի զինծառայող:-0-
