ԵՐԵՎԱՆ, 17 նոյեմբերի./Նովոստի–Արմենիա/. Խաղաղության զարգացման դարաշրջան բացելը հեշտ չի լինելու, և այդ գործընթացը միայն մեզնից կախված չէ:
«Ամուր նյարդեր են պետք մեզ: Խաղաղ զարգացման դարաշրջան բացելը, ցավոք, միայն մեզնից չէ կախված. լինելու են գործողություններ, որոնց նպատակը լինելու է ապացուցել մեր հանրությանը, որ խաղաղ զարգացման դարաշրջանը հնարավոր չէ»,-ասաց Փաշինյանը ԱԺ–ում կառավարության հետ հարց ու պատասխանի ժամանակ:
Փաշինյանի խոսքով՝ ԼՂ հակամարտության բանակցային ողջ գործընթացում Հայաստանի ասելիքը միջազգային հարթակներում կորսված է:
«Մենք պետք է գնանք լուծումների: Բայց այն, ինչ մեր դիրքրոշումն է, չի նշանակում, որ ցանկացած լուծում մեզ համար ընդունելի կլինի, բայց դա չի էլ նշանակում, որ մեր պատկերացրած ցանկացած լուծում ընդունելի կլինի հակառակորդ կողմից կամ միջազգային հանրության համար»,-ընդգծեց նա:
Փաշինյանը պարզաբանեց, թե կնչո՞ւ բանակցային գործընթացի արդյունքում ԼՂ հակամարտույթան կարգավորման հարցով հաջողություն չի գրանցվել։
«Որովհետև մեր ընկալումները ընկալելի չեն եղել միջազգային հանրության համար, Ադրբեջանի մասին հլը չեմ խոսում, միջազգային հանրության ընկալումներն էլ ընդունելի չեն եղել մեզ համար», – նշեց վարչապետը:
Նա նաև շեշտեց, որ մի բան հաշվի չեն առել, որ միջազգային հանրությանը ոչ թե Ղարաբաղի հարցի հայանպաստ լուծումն է հետաքրքրում, այլ առհասարակ հարցի լուծումն է հետաքրքրում:
«Կներեք անկեղծության համար, համարենք, որ նիստը դռնփակ է, մենակ Հայաստանում են լսում. միջազգային հանրությունը մեզ էլ, Ադրբեջանին էլ ասում է՝ «դե հերիք է շաբաթը մեկ ասեք՝ վայ, հրադադարի ռեժիմը խախտվեց, վայ ագրեսիա է, իրար մեղադրեք, կներեք՝ գնացեք, իրար հետ լեզու գտեք, արդեն մեր նյարդերը չի հերիքում, որովհետև մենք էլ խնդիրներ ունենք, մանավանդ, հիմա՝ կլիմայի փոփոխություն է, կորոնավիրուս է, հազար ու մի հարցեր: Ձեզ ինչո՞ւ է թվում, որ ամբողջ աշխարհը պետք է նստի ու անընդհատ ապրի ձեր հոգսերով, միգուցե, դուք էլ մի քիչ ձեր հոգսերով ու դարդերով զբաղվեք»», - հայտարարեց ՀՀ վարչապետը:
Փաշինյանը հավելեց, որ ԼՂ հարցում չկա հայանպաստ կամ ադրբեջանանպաստ լուծում։
«Կա կամ լուծում, կամ չլուծում», – նշեց նա:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
