ԵՐԵՎԱՆ, 19 հունվարի./Նովոստի-Արմենիա/. Հայաստանը Ռուսաստանին և Ադրբեջանին է փոխանցել հայ-ադրբեջանական սահմանագոտու իրավիճակի դեէսկալացիային ուղղված միջոցառումների փաթեթ, հայտարարեց ՀՀ ԱԳ նախարար Արարատ Միրզոյանն ԱԺ-ում կառավարության ժամի ընթացքում:
Նրան հարց տվեցին, թե ինչ առաջարկների մասին էր խոսում ՌԴ ԱԳ նախարար Սերգեյ Լավրովը, վերջերս կայացած ասուլիսի ժամանակ անդրադառնալով հայ-ադրբեջանական սահմանագոտու դելիմիտացիայի և դեմարկացիայի հարցին և նշելով, որ իր հետ զրույցում հայկական կողմն առաջարկներ է փոխանցել, որոնք փոխանցվել են Բաքվին:
«Այո, դուք ճիշտ եք: Լավրովը հանդես է եկել նման հայտարարությամբ, և նրա տեղեկատվությունը համապատասխանում է իրականությանը: Այո, հայկական կողմը Հայաստան-Ադրբեջան սահմանագոտում իրավիճակի դեէսկալացիային, լարվածության նվազման, անվտանգության և կայունության մակարդակի բարձրացմանն ուղղված մի շարք միջոցառումների փաթեթ է նախապատրաստել և փոխանցել ինչպես ռուսական կողմին, այնպես էլ ռուսական կողմի միջնորդությամբ Ադրբեջանին և մյուս գործընկերներին», - հայտարարեց Միրզոյանը:
Նա նշեց, որ պատասխան դեռ չկա, բայց ձեռնպահ մնաց մանրամասներ ներկայացնելուց՝ նշելով, որ «իմաստ չունի»:
«Կարող եմ ասել միայն, որ դրանք բխում են կառավարության և վարչապետի կողմից նախապես և մշտապես բարձրաձայնված՝ զորքերի հայելային հետքաշմանը և հավելյալ անվտանգության մեխանիզմների ստեղծումից, մեր ընդհանուր նախապես հռչակած հայեցակարգից», - պարզաբանեց նա՝ ավելացնելով, որ այդ փաթեթն ու մոտեցումները ներկայացվել են Անվտանգության խորհրդի նիստին:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
