ԵՐԵՎԱՆ, 11 նոյեմբերի./Նովոստի–Արմենիա/. ԵՄ-Հայաստան համապարփակ և ընդլայնված համագործակցության համաձայնագիրը բոլոր ոլորտներում համակողմանի անդրադառնում է մեր ազգային ռեֆորմի օրակարգին՝ սկսած տնտեսությունից մինչև արդարատադություն, մարդու իրավունքներ և այլն:
Այս մասին այսօր հրավիրված ասուլիսում հայտնեց արդարադատության նախարարի առաջին տեղակալ Քրիստինե Գրիգորյանը:
Նրա խոսքով՝ համաձայնագիրն էականորեն ազդում է երկրի ժողովրդավարական զարգացման, ինստիտուտների կայունացման ու զարգացման վրա: Սակայն այս ամենն ընդամենը հովանոցային կարգավորումներ են:
«Եվ դրա ներքո մեր պետութան դեպքում գործում են հենց ոլորտային բարեփոխումների ռազմավարությունները, գործողությունների ծրագրերը, որոնց իրագործումը ներդաշնակվում է համաձայնագրի իրականացման հետ: Այսինքն համաձայնագիրը տալիս է առաջարկ, իսկ իրականացնելու միջոցներն արդեն ներպետական խնդիր է»,-ասաց Գրիգորյանը:
Նա նշեց նաև, որ համաձայնագիրը չի խառնվում ներպետական գործերի մեջ այնքան, որ սահմանի, թե պետությունը որ դրույթն ինչպես փոխի: Այսինքն համաձայնագիրն արձանագրում է նպատակը՝ ինչպես ստեղծել առավել ժողովրդավարական ընտրական համակարգեր:
«Հիմա այս առավել ժողովրդավարական ընտրական համակարգի նպատակը մի երկրի դեպքում հնարավոր է հասնել այլ ճանապարհով, մյուս երկրի դեպքում մեկ այլ կերպ: Տվյալ դեպքում մենք պետք է տեսնենք, թե որն է ժողովրդի պահանջը, և ինչն է պետք փոխել, որպեսզի ժողովրդի պահանջը բավարարվի»,-ասաց արդարադատության նախարարի առաջին տեղակալը:
Մասնագետը ԵՄ-Հայաստան համապարփակ և ընդլայնված համագործակցության համաձայնագրի իրականացման ընթացքը համարեց դրական՝ դիտարկելով նաև այն բոլոր մարտահրավերները՝ համավարակ, պատերազմ, որոնց իրականացման ընթացքում Հայաստանը ևս հանդիպել է իր ճանապարհին:
«Եվ պետք է վստահեցնեմ, որ եվրոպական գործընկերների հետ մենք ունենք նույնական ընկալում, որ ամենակարևորը մեր ժողովրդավարության օրակարգից որևէ կերպ պետք է չշեղվենք: Նախարարությունը ունի համաձայնագիր, որի ներքո՝ վարչապետի որոշմանմբ, հաստատվել է իրականացման ճանապարհային քարտեզ: Եվ այդ քարտեզում մենք ունենք տարիների պլանավորում, որովհետև այն օպերացիոն փաստաթուղթ է, այսինքն՝ որ փոփոխությունը ինչ ժամանակահատվածում և ով պետք է իրականացնի»,-ընդգծեց մասնագետը:
Նրա խոսքով՝ 2019թ.-ից սկսած ունեցել են մի քանի ռազմավարական փաստաթղթերի մշակման և ընդունման պահանջ: Առաջինը՝ դատական և իրավական բարեփոխումների ռազմավարությունն էր, մյուսը՝ հակակոռուպցիոնը, հաջորդն էլ՝ մարդու իրավունքների պաշտպանության ազգային ռազմավարությունն էր, որոնք ընդունվել են հենց 2019-ին:
«Իսկ 2020 թ.-ին ունեինք 3 միջոցառումներ, որոնք չէինք հասցրել իրականացնել, բայց իրականացրինք 2021 թ.-ի առաջին կիսամյակի ընթացքում: Առաջինը վերաբերում էր քրեական նոր դատավարության օրենսգրքերի ընդունմանը, որոնք մենք հաստատեցինք ապրիլ-մայիս ամիսներին: Մյուս միջոցառումը՝ հակակոռուպցիոն ինստիտուցիոնալ համակարգի ամրապնդումն էր և հակակոռուպցիոն կոմիտեի ստեղծումը: Իսկ հաջորդ ուշացած միջոցառումը պարեկային շրջիկ ծառայության ստեղծումն էր, որը կրկին հաջողվեց Երևանում գործարկել: Կարող եմ ասել, որ բավական լավ փուլում ենք այժմ»,-ասաց Գրիգորյանը:
Նրա խոսքով՝ 2019 թ.-ին դատավոների բարեվարքության ստուգման մեխանիզմ է ներդրվել: Այսինքն ինչպես գործող, այնպես էլ նոր թեկնածու դատավորների, դատախազների, քննիչների գույքային դրության ստուգում է իրականցվում, որը կատարվում է կոռուպցիայի կանխարգելման հանձնաժողովի կողմից կոնկրետ մշակված մեթոդաբանությամբ:
«Չնայած այս ամենին, կարծում եմ՝ մենք դեռ բավական երկար ճանապարհ ունենք որպես պետություն ժողովրդավարացման համար: Եվրոպական միության հետ մեր համագործակցության թիրախում է նաև հենց մեր ազգային ռազմավարությունը մարդու իրավունքների պաշտպանության հետ կապված, որտեղ ամենակարևոր կետում են դրված խտրականության բացառման օրակարգը, ատելության խոսքի կարգավորումները, որոնք էլի հանձնառություն ենք ստանձնել, որ պարտադիր իրականացնենք»,-նշեց արդարադատության նախարարի առաջին տեղակալը:
Նա նաև հավելեց, որ առաջիկայում կա իրավահավասարության մասին նախագիծ և մի շարք այլ նախագծերի փաթեթ, որոնք ճանապարհային քարտեզի շրջանակներում հանձ են առել իրականացնել մինչև 2026 թ.:–0–
