ԵՐԵՎԱՆ, 2 նոյեմբերի./Նովոստի–Արմենիա/. ՀՀ փոխվարչապետ Մհեր Գրիգորյանը պարզաբանել է ՌԴ նախագահ Վլադիմիր Պուտինին Փաշինյանի դիմելու պատճառներն` ի պատասխան այն հարցին, թե ինչու դա չի արվել պատերազմի առաջին օրերին, այլ ընդամենը մեկ ամիս անց։
«Պահը որոշվել է` ելնելով ռազմաճակատում տիրող իրավիճակից։ Երևի եկել էր պահը, երբ կուտակումը կամ տեղակայումը (հակառակորդի ԶՈւ–ի, խմբգր.) վկայում էին այն մասին, որ հարկավոր է դիմել, քանի որ իրավիճակն, ամենայն հավանականությամբ, այնպիսին էր, որ այն կարելի էր գնահատել որպես սպառնալիք, այդ թվում` Հայաստանի սահմանների համար», – ասաց Գրիգորյանը։
Նա վստահություն հայտնեց, որ որոշումն ընդունվել է վերլուծությունների հիման վրա` հաշվի առնելով զինվորականների խորհուրդները։
Պատասխանելով լրագրողի այն հարցին, թե ինչու նամակում նշվում էր 1997թ.–ի համաձայնագիրը, այլ ոչ թե ավելի ուշ կնքված փաստաթուղթը` Գրիգորյանը նշեց, որ այդ համաձայնագիրը ֆունդամենտալ, բազային համաձայնագիր է, ինչի կապակցությամբ Հայաստանի իշխանությունները հղում են արել հենց դրա վրա։
Պուտինին ուղղված Փաշինյանի նամակում նշվում է, որ հաշվի առնելով մարտական գործողությունների Հայաստանի Հանրապետության սահմանին մոտենալու, ՀՀ տարածքի նկամամբ արդեն իսկ տեղի ունեցած ոտնձգությունների փաստերը՝ ՀՀ վարչապետը դիմել է ՌԴ նախագահին սկսելու անհապաղ խորհրդակցություններ՝ սահմանելու աջակցության տեսակները և չափը, որը Ռուսաստանի Դաշնությունը կարող է հատկացնել Հայաստանի Հանրապետությանը՝ իր անվտանգության ապահովման համար՝ հիմք ընդունելով Հայաստանի և Ռուսաստանի միջև դաշնակցային հարաբերությունները և 1997թ. օգոստոսի 29-ի «Բարեկամության, համագործակցության և փոխադարձ աջակցության մասին։
ՌԴ ԱԳՆ–ն իր հերթին հայտնել է, որ Ռուսաստանը, պայմանագրի համաձայն, անհրաժեշտ օգնություն կցուցաբերի Երևանին, եթե մարտերը տեղափոխվեն անմիջապես Հայաստանի տարածք։–0–
