ՀՀ նախագահն Ադրբեջանում գտնվող ռազմագերիների, պատանդների վերադարձի հարցով դիմել է Պուտինին

ԵՐԵՎԱՆ, 30 նոյեմբերի./Նովոստի–Արմենիա/. Հայաստանի Հանրապետության նախագահ Արմեն Սարգսյանը ադրբեջանական կողմում գտնվող ռազմագերիների, պատանդների վերադարձի հարցով դիմել է Ռուսաստանի Դաշնության նախագահ Վլադիմիր Պուտինին, հաղորդում է ՀՀ նախագահի մամուլի ծառայությունը:


Նախագահ Սարգսյանի նամակում մասնավորապես նշվում է, որ Հայաստանի հասարակությունն ու սփյուռքը խիստ անհանգստացած են ադրբեջանական գերության մեջ հայտնված զինվորների և քաղաքացիական անձանց շուրջ ստեղծված իրավիճակով:

«Ռուսաստանի նախագահի միջնորդությունը մեծ աջակցություն կլինի Ադրբեջանի կողմից գերեվարված մեր զինվորականներին և քաղաքացիական անձանց, ինչպես նաև զոհվածների մարմինները վերադարձնելու չափազանց զգայուն խնդրի լուծման գործում», – նշվում է գերատեսչության հաղորդագրության մեջ:–0–