Ղազախստանում ՀԱՊԿ պատասխանատվության գոտում լարվածությունը չի նվազում. Փաշինյան (ՎԻԴԵՈ)

ԵՐԵՎԱՆ, 10 հունվարի./Նովոստի–Արմենիա/.  Ղազախստանում ՀԱՊԿ պատասխանատվության ոլորտում լարվածության նվազում չի նկատվում, ասաց ՀՀ վարչապետ Նիկոլ Փաշինյանը Ղազախստանում տիրող իրավիճակի շուրջ ՀԱՊԿ շրջանակներում կայացած քննարկումների ժամանակ։

ՀԱՊԿ երկրների ղեկավարները տեսակոնֆերանսի ձևաչափով արտահերթ հանդիպում են անցկացրել՝ քննարկելու իրադարձությունների զարգացումը Ղազախստանում, որտեղ մի քանի օր շարունակ հակաահաբեկչական գործողություն է ընթանում, և արդեն ՀԱՊԿ հավաքական խաղաղապահ ուժեր են տեղակայվել: Կազմակերպության Հավաքական անվտանգության խորհրդի արտակարգ նիստ անցկացնելու նախաձեռնությամբ հանդես է եկել Ղազախստանի նախագահ Կասիմ-Ժոմարտ Տոկաևը։

«Հաշվի առնելով Ղազախստանի պաշտոնական դիմումը և իրավիճակի արագ զարգացման միտումը, ինչպես նաև երկրի անվտանգությանը, կայունությանն ու ինքնիշխանությանը սպառնացող վտանգի առաջացումը՝ Ղազախստանում իրավիճակը կարգավորելու նպատակով ՀԱՊԿ Հավաքական անվտանգության խորհուրդը որոշում է կայացրել սահմանափակ ժամկետով խաղաղապահներ ուղարկել Ղազախստան՝ ռազմավարական կարևոր օբյեկտների պաշտպանության համար»,- ասաց վարչապետ Փաշինյանը:

Նրա խոսքով՝ ՀԱՊԿ պատասխանատվության գոտում լարվածության տեսանելի նվազում չի նկատվում, և դեռևս շարունակում ենք բախվել նոր տեսակի սպառնալիքների։

«Ղազախստանում տիրող իրավիճակը մեզ մոտ առանձնահատուկ անհանգստություն և մտահոգություն է առաջացնում՝ միջազգային ահաբեկչական կազմակերպությունների ներգրավվածության վերաբերյալ տեղեկատվության տրամադրման առնչությամբ։ Ոչ վաղ անցյալում մենք ինքներս բախվել ենք մեր տարածաշրջանում օտարերկրյա ահաբեկիչների ի հայտ գալուն»,-ընդգծեց Փաշինյանը։

Փաշինյանը նշեց, որ ՀԱՊԿ-ում Հայաստանի նախագահության առանցքային առաջնահերթություններից է կազմակերպության ճգնաժամային արձագանքման մեխանիզմների ամրապնդումը։

«Ելնելով դրանից՝ մենք ակնկալում ենք, որ ՀԱՊԿ անդամ երկրները համատեղ ջանքեր կգործադրեն այդ մեխանիզմների հետագա կատարելագործման համար, ինչը, անկասկած, կծառայի ինչպես անդամ պետությունների միջև փոխգործակցության հետագա զարգացմանը, այնպես էլ Կազմակերպության համապատասխան կառույցների ու մեխանիզմների ամրապնդմանը»,- շեշտեց նա:

Փաշինյանը հավելեց նաև, որ համատեղ գործողությունների նպատակն է հնարավորինս շուտ կայունացնել իրավիճակն ու երկրին բնականոն կյանքին վերադարձնել։

«Սա ծայրահեղ կարևոր պահ է քաղաքացիների համար տարրական կենսապայմանների ապահովման, ինչպես նաև ռազմավարական նշանակություն ունեցող օբյեկտների անվտանգության ապահովման համար»,– եզրափակեց վարչապետը։–0–