Ցանկանում ենք, որ հարաբերությունները շարունակեն զարգանալ՝ ելնելով մեր քաղաքացիների, մեր փոխգործակցության շահերից. կայացել է Լավրով–Միրզոյան հանդիպումը (ՎԻԴԵՈ)

ԵՐԵՎԱՆ, 31 օգոստոսի./Նովոստի–Արմենիա/. Մոսկվայում մեկնարկել է ՌԴ ԱԳ նախարար և ՀՀ ԱԳ նախարար Սերգեյ Լավրովի և Արարարտ Միրզոյանի հանդիպումը:

«Այսօր լավ հնարավորություն կա՝ կարծիքներ փոխանակելու, թե ինչ վիճակում են գտնվում մեր երկկողմ հարաբերությունները: Դրանք հագեցած են՝ և՛տնտեսություն, և՛ անվտանգության ոլորտ, և՛ ներդրումներ: Մենք դաշնակիցներ ենք ՀԱՊԿ-ի շրջանակում: Խոսքը նաև հումանիտար, կրթական և գիտական կապերի մասին է և, իհարկե, խորհրդարանների և հասարակական կազմակերպությունների միջև կապերի: Մենք հետաքրքրված ենք դրանով: Ցանկանում ենք, որ այդ հարաբերությունները շարունակեն զարգանալ՝ ելնելով մեր քաղաքացիների, մեր փոխգործակցության շահերից»,- ասել է Լավրովը։

Նա նշել է, որ հանդիպման ընթացքում առանձին ուշադրություն է դարձվելու միջազգային հարցերին:

Նախարարն ընդգծել է, որ «սերտ համագործակցություն է ծավալվում ՄԱԿ-ում, ԵԱՀԿ-ում, Եվրոպայի խորհրդում»:

«Առանձին թեմա է, իհարկե, Լեռնային Ղարաբաղում տիրող իրավիճակի կարգավորումը: Այստեղ կան շատ հարցեր, որոնք անմիջականորեն քննարկվում են նախագահների, ՀՀ վարչապետի կողմից: Կան հարցեր, որոնք տեղում կարգավորում են մեր զինվորականները` հայ և ադրբեջանցի գործընկերների հետ: Գործում է փոխվարչապետերի ձևաչափով եռակողմ աշխատանքային խմբի մեխանիզմն՝ ուղղված տնտեսական կապերի ապաշրջափակմանը»,- ընդգծել է Լավրովը:–0–