ԵՐԵՎԱՆ, 2 հոկտեմբերի./Նովոստի–Արմենիա/. ԲՀԿ առաջնորդ Գագիկ Ծառուկյանն անդրադարձել է Սահմանադրական դատարանի նախագահ Հրայր Թովմասյանի լիազորությունները դադարեցնելու հարցին։
«Խմբակցությունով հավաքվել են, քննարկել են, երկար ժամանակ այդ հարցի շուրջ խոսում են։ Հիմնավորումները շատ թույլ են։ Ազգային ժողովի որոշումը չի` Հրայր Թովմասյանը մնա, թե հեռանա։ Որոշողը Սահմանադրական դատարանն է, դրա համար մենք մեր խմբակցությունով որոշեցինք չմասնակցել այդ քվեարկմանը», – նշեց Ծառուկյանը։
Սեպտեմբերի 16–ին «Իմ քայլը» խմբակցությունը որոշել է սկսել Սահմանադրական դատարանի նախագահ Հրայր Թովմասյանի լիազորությունների դադարեցման գործընթացն այն բանից հետո, երբ ՍԴ–ն Սահմանադրությանը հակասող ճանաչեց ՀՀ երկրորդ նախագահ Ռոբերտ Քոչարյանի գործով մեղադրանքի որոշ կետեր։ Սեպտեմբերի 24–ին ՀՀ ԱԺ պետաիրավական հարցերի մշտական հանձնաժողովը հավանություն տվեց «Իմ քայլը» խմբակցության կողմից մշակած նախագծին, որը վերաբերում է Թովմասյանի լիազորությունների դադարեցմանը։–0–