ԵՐԵՎԱՆ, 3 հոկտեմբերի./Նովոստի–Արմենիա/. ԱՄՆ Պետդեպարտամենտը ձեռնպահ է մնացել Արցախից 100 հազար հայերի տեղահանումը Հայաստան էթնիկ զտում անվանելուց։
Պետքարտուղարության խոսնակ Մեթյու Միլերը ճեպազրույցում նշել է, որ Միացյալ Նահանգները լրջորեն է վերաբերվում էթնիկ զտումների, ցեղասպանության և այլ վայրագությունների մասին մեղադրանքներին։
«Մենք շփվում ենք տեղում (Արցախում)` այս իրավիճակի հետ կապված: Բայց ցեղասպանության կամ էթնիկ զտումների մասին որոշումը հիմնվում է փաստերի վրա հիմնված գործընթացի վրա», - ասել է նա։
Միլերը դժվարացել է ասել, թե Հայաստան մեկնած Արցախի 100 հազար էթնիկ հայերի քանի տոկոսն է ծրագրում ընդմիշտ մնալ այնտեղ, քանի՞ տոկոսը կարող է ցանկանալ վերադառնալ, եթե պայմանները թույլ տան։ «Մենք վերահաստատում ենք մեր կոչը՝ ստեղծելու անկախ միջազգային դիտորդական առաքելություն, որը կապահովի թափանցիկությունը և կհավաստիացնի Լեռնային Ղարաբաղի բնակչությանը, որ էթնիկ հայերի իրավունքներն ու անվտանգությունը, ովքեր ցանկանում են վերադառնալ, պաշտպանված կլինեն», - ընդգծել է Միլլերը՝ հիշեցնելով, որ Ադրբեջանը տվել է նման հավաստիացումներ:
Նրա խոսքով, ԱՄՆ-ը կարծում է, որ Արցախում պետք է ստեղծվի միջազգային դիտորդական առաքելություն, որը կերաշխավորեր տեղի բնակիչների իրավունքների պահպանումը։
Միլերը մեկնաբանել է նաև Արցախ այցելած ՄԱԿ-ի առաջին առաքելության զեկույցը։
«Մենք ողջունում ենք այս առաքելությունը: Մենք շարունակում ենք աշխատել մեր դաշնակիցների և գործընկերների հետ այն հարցի շուրջ, թե ինչպիսին պետք է լինի ավելի երկարաժամկետ առաքելությունը: Այսօր ես նոր տեղեկատվություն չունեմ այս հարցի վերաբերյալ», - եզրափակել է Պետդեպարտամենտի խոսնակը:
Նա նաև կոչ է արել Հայաստանին և Ադրբեջանին վերադառնալ խաղաղ բանակցություններին՝ քննարկելու և ի վերջո լուծում գտնելու մնացած վիճահարույց հարցերի շուրջ։
ՄԱԿ–ի առաքելության մասին
Ստեփանակերտ այցելությունից հետո ՄԱԿ–ի տարածած հայտարարության համաձայն՝ քաղաքացիական ենթակառուցվածքների, այդ թվում՝ դպրոցների և հիվանդանոցների ոչնչացման նշաններ չեն եղել, թեև բոլոր խանութները փակ են։ Նշվում է, որ ՄԱԿ-ի թիմը «տեղական համայնքների ներկայացուցիչներից լսել է, որ Ղարաբաղում մնացել է 50-ից 1 հազար էթնիկ հայ» և «վերջին զինադադարից հետո խաղաղ բնակչության նկատմամբ բռնության մասին որևէ հաղորդում չի լսել»։
Այս առնչությամբ Հայաստանի արտգործնախարար Արարատ Միրզոյանն ընդգծել է, որ ՄԱԿ-ի առաքելությունն ուշացել է։ «Այս պահին, ցավոք սրտի, այս առաքելության միակ արդյունքը կարող է լինել Լեռնային Ղարաբաղի հայ բնակչության էթնիկ զտումների արձանագրումը»,- ասել է Միրզոյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
