44–օրյա պատերազմի պարտության միջով անցնելով՝ մենք ձեռք ենք բերել անկախ, ինքնիշխան պետություն ունենալու հնարավորություն․ Փաշինյան (ՎԻԴԵՈ)
ԵՐԵՎԱՆ, 4 փետրվարի․/Նովոստի–Արմենիա/․ 44–օրյա պատերազմի պարտության միջով անցնելով՝ մենք ձեռք ենք բերել անկախ, ինքնիշխան պետություն ունենալու հնարավորություն, հայտարարել է Փաշինյանը։
«Մմ գնահատմամբ, այսօր այդ պարտության միջով անցնելով՝ ձեռք ենք բերել անկախ, ինքնիշխան պետություն ունենալու հնարավորություն: Ես երկար եմ մտածել և եկել այն եզրահանգման, որ մեր ընկած նահատակները, իրենց զոհողությունները ոչ թե ոչնչի, այլ Հայաստանի անկախության և ինքնիշխանության համար են եղել, և մենք հիմա պարզապես պետք է կենտրոնանք այդ զոհողության հնարավորությունը օգտագործելու վրա», – հայտարարել է Փաշինյանը Վաշինգտոնում ամերիկահայ համայնքի ներկայացուցիչների հետ հանդիպման ժամանակ։
Փաշինյանը կարծում է, որ «որոշակի հանգամանքների բերումով» Հարավային Կովկասի տարածաշրջանում մեծ նեգատիվ է ձևավորվել Հայաստանի նկատմամբ։
«Շատ կարևոր է, որ մենք կարողանանք այդ նեգատիվը կառավարել։ Ընդ որում այս նեգատիվը կառավարելու մի քանի մոտեցում և տարբերակ կա։ Իմ կարծիքով, մենք ճիշտ ենք վարվում, որ փորձում ենք այդ նեգատիվը կառավարել առավելագույնս հավասարակշռված ձևերով, առանց էմոցիաներին տրվելու, հակառակ դեպքում այդ նեգատիվը շատ արագ կարտահայտվի», – ասել է նա։
Նրա կարծիքով, տառապանքների և կորուստների գնով ստացված հնարավորությունն օգտագործելու, Հայաստանի հարատևության խնդիրը լուծելու համար անհրաժեշտ է ստեղծել այնպիսի իրավիճակ, որի դեպքում «մենք մեր տարածաշրջանում՝ մեր հարևանների միջավայրում կկարողանանք ապրել առանց արտաքին օգնության»։
«Սա չի նշանակում, որ մենք տարբեր դաշինքներ, ամենատարբեր աշխարհաքաղաքական կենտրոնների հետ համագործակցություն չպետք է ունենանք», – ասել է Փաշինյանը։
