«3+3» ձևաչափը պետք է պոզիտիվ ավելացնի տարածաշրջանի երկրների փոխհարաբերություններում. ՌԴ դեսպան

ԵՐԵՎԱՆ, 13 դեկտեմբերի./Նովոստի–Արմենիա/. «3+3» ձևաչափը պետք է պոզիտիվ ավելացնի տարածաշրջանի երկրների փոխհարաբերություններում, հայտարարեց ՀՀ–ում ՌԴ արտակարգ և լիազոր դեսպան Սերգեյ Կոպիրկինը լրագրողների հետ զրույցում։

Դեկտեմբերի 10–ին Հայաստանի, Ռուսաստանի, Ադրբեջանի, Թուրքիայի և Իրանի դիվանագետները Մոսկվայում «3+3» ձևաչափով նիստի ժամանակ քննարկել են համագործակցության հեռանկարներն ու հակազդությունը տարածաշրջանի ընդհանուր սպառնալիքներին, ինչպես նաև հետաքրքրություն են հայտնել, որպեսզի Վրաստանը միանա համատեղ աշխատանքին։

«Սա հնարավորություն է քննարկելու այն հարցերը, որոնք հետաքրքրում են բոլորին։ Մենք տեսնում ենք այս ձևաչափի ավելացված արժեքը նրանում, որպեսզի երկխոսության, կարծիքների փոխանակման հնարավորություն տանք այն հարցերի շուրջ, որոնք հետաքրքրում են տարածաշրջանի բոլոլր երկրներին։  Տեսնում ենք, որ ձևաչափը պետք է պոզիտիվ ավելացնի տարածաշրջանի երկրների փոխհարաբերություններում» ,– ասաց Կոպիրկինը` պատասխանելով «Նովոստի–Արմենիա»–ի հարցին։

Անդրադառնալով այն հարցին, թե դա կարո՞ղ է ազդել հայ–ռուսական հարաբերությունների վրա` Կոպիրկինը նշեց, որ և′ Ռուսաստանի, և′ Հայաստանի համար դա փոխգործակցության և համագործակցության ուղղություններից, տարածքներից մեկն է։

Ղարաբաղի և Անդրկովկասում տնտեսական և տրանսպորտային կապերի ապաշրջափակման հարցով «3+3» ձևաչափի նախաձեռնությամբ ավելի վաղ հանդես են եկել Ադրբեջանի և Թուրքիայի առաջնորդներ Իլհամ Ալիևն ու Ռեջեփ Թայիպ Էրդողանը։ Ռուսաստանն ու Իրանը ողջունել են այս նախաձեռնությունը։ Վրաստանը հայտարարել է, որ չի նախատեսում մասնակցել այդ տարածաշրջանային նախաձեռնությանը, բայց առաջարկում է Բաքվի և Երևանի միջև բանակցությունների սեփական ձևաչափը` խաղաղությանն աջակցելու համար։–0–