ԵՐԵՎԱՆ, 19 հոկտեմբերի. /Նովոստի–Արմենիա/. Հայ–ռուսական ռազմավարական հարաբերություններն օրեցօր ամրապնդվում են, ասել է ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն ՀՀ ԱԺ խոսնակ Գալուստ Սահակյանի հետ հանդիպման ժամանակ, որը տեղի է ունեցել նախօրեին Ժնևում Միջխորհրդարանական միության 133-րդ վեհաժողովի շրջանակում։
Ինչպես հաղորդում է ՀՀ Ազգային ժողովի մամուլի ծառայությունը, Մատվիենկոն անդրադարձել է հայ-ռուսական փոխհարաբերությունների վերջին զարգացումներին և Եվրասիական տնտեսական միության շրջանակում համագործակցությանը:
Նա նշել է, որ Ռուսաստանի Դաշնությունը, գտնվելով միջազգային որոշակի պատժամիջոցների ազդեցության տակ, այնուամենայիվ, դրանք հաղթահարում է և զարգացնում տնտեսությունը։«Դաշնության խորհրդի նախագահն ընդգծել է, որ հայ-ռուսական բարեկամական և ռազմավարական հարաբերությունները շարունակում են զարգանալ և օրեցօր ամրապնդվել», – նշվում է հաղորդագրության մեջ։
Վալենտինա Մատվիենկոն, անդրադառնալով աշխարհաքաղաքական վերջին զարգացումներին ու ներկա վիճակին, կարծիք է հայտնել, որ տնտեսության զարգացման լավագույն մոդելը պետությունների միասնական միությունների ստեղծումն է, որտեղ մասնակից պետությունների հնարավորություններն ավելանում են:
Գալուստ Սահակյանն իր հերթին նշել է, որ Հայաստանի և Ռուսաստանի դաշնակցային ռազմավարական գործընկերության հիմքում ոչ միայն արդի փոխշահավետ համագործակցությունն է, այլև երկու եղբայրական ժողովուրդների դարավոր բարեկամությունը, մշակութային և հոգևոր մտերմությունը։
«Այսօր կարելի է փաստել, որ տարբեր մակարդակներում պարբերական բնույթ կրող փոխայցելությունները նպաստում են հայ-ռուսական հարաբերությունների ամրապնդմանը և հնարավորություն տալիս քննարկել բազմաթիվ օրակարգային հարցեր», – նշել է Սահակյանը։
Նա նաև ավելացրել է, որ Հայաստանի և Ռուսաստնի փոխադարձ աջակցությունը միջազգային կազմակերպություններում բխում է երկու երկրների դաշնակցային շահերից:
Հանդիպման ժամանակ քննարկվել են նաև Մատվիենկոյի՝ նոյեմբերին Հայաստանի Հանրապետություն սպասվող այցի մանրամասները, որին նախորդելու է հայ-ռուսական միջխորհրդարանական հանձնաժողովի 27-րդ նիստը:–0–