ԵՐԵՎԱՆ, 15 մայիսի. /Նովոստի-Արմենիա/. Հայ-ռուսական հարաբերությունները չեն կարող խանգարել փոխշահավետ հարաբերություններին ԱՄՆ-ի հետ: Այդ մասին այսօր լրագրողների հետ զրույցում հայտարարեց Հայաստանում Ամերիկայի Միացյան նահանգների դեսպան Լին Թրեյսին:
«Մենք հասկանում ենք, որ Հայաստանն ամուր պատմական և աշխարհագրական կապեր ունի Ռուսաստանի հետ, սակայն կարծում եմ, որ շատերը Հայաստանում կհամաձայնվեն, որ հայ-ռուսական հարաբերությունները չեն կարող և չեն սահմանափակում փոխշահավետ հարաբերությունները ԱՄՆ-ի կամ այլ գործընկերների հետ», - ասաց նա:
Թրեյսին նշեց, որ միջազգային հարաբերությունները վակուումի մեջ չեն:
«Աշխարհագրորեն և պատմականորեն Հայաստանը կապված է Ռուսաստանի հետ, սակայն իր արժեհամակարգով Հայաստանը կապված է արևմուտքի հետ, և այդ կապերը չեն հակասում միմյանց: Արտաքին քաղաքականությունում մեկի առավելությունը չի նշանակում մյուսի պարտությունը», - ասաց դեսպանը:-0-
