ԵՐԵՎԱՆ, 25 հոկտեմբերի․ /Նովոստի-Արմենիա/․ ԱՄՆ նախագահի անվտանգության հարցերով խոհրհդական Ջոն Բոլթոնը «Ազատություն» ռադիոկայանին տված հարցազրույցում հայտնել է, որ առաջարկել է ՀՀ վարչապետի պաշտոնակատար Նիկոլ Փաշինյանին գնել ոչ թե ռուսական, այլ ամերիկյան ռազմական տեխնիկա։
«Ինչպես ասացի վարչապետին՝ եթե խնդիրն այն է, որ ընտրություն պետք է կատարես ռուսական և ամերիկյան ռազմական տեխնիկա գնելու միջև, մենք կնախընտրեինք վերջին տարբերակը», - ասել է նա։
«Մենք կարծում ենք, որ մեր տեխնիկան ամեն դեպքում ավելի լավն է, քան ռուսականը: Այնպես որ, ուզում ենք դիտարկել այդ հնարավորությունը: Կարծում եմ, որ այն ավելացնում է Հայաստանի հնարավորւթյունները, երբ այն ամբողջովին կախված չէ մեկ գերտերությունից։ Ես հասկանում եմ աշխարհագրական դիրքի և պատմական իրողությունների հետ կապված հարցերը, բայց կարծում եմ՝ ժամանակն է լավատես լինելու, որ Հայաստանը կարող է ավելի տեսանելի լինել համաշխարհային ասպարեզում», - հավելել է Ջոն Բոլթոնը։-0-