ԵՐԵՎԱՆ, 6 դեկտեմբերի./Նովոստի–Արմենիա/. Հայաստանի կողմից ՀԱՊԿ գլխավոր քարտուղարի պաշտոնի կորուստը Նիկոլ Փաշինյանի կառավարության ամենալուրջ բացթողումն է, հայտարարեց ՀՀԿ առաջին փոխնախագահ, պաշտպանության նախկին նախարար Վիգեն Սարգսյանը Հանրային հեռուստաընկերության ուղիղ եթերով հեռարձակվող նախընտրական բանավեճի ժամանակ։
«Այսօր ՌԴ ԱԳՆ պաշտոնական ներկայացուցչի հետ ձեր հեռակա վիճաբանությունները ոչ մեկին պատիվ չեն բերում», – կարծում է Սարգսյանը։
Նրա խոսքով, այս պահին Հայաստանը խնդիր ունի` կապված դաշնակիցների հետ ճիշտ հարաբերություններ կառուցելու և «կարմիր գծերը» ճշգրտելու հետ, որոնք հայկական կողմը չի կարող անցնել իր հարևանների հետ հարաբերություններում։
Загружается новость ... "Лево"
Երևանն ու Մոսկվան տարբեր պատճառներ են նշում Սանկտ Պետերբուրգում նախատեսվող ՀԱՊԿ գագաթնաժողովի հետաձգման համար։ Այսպես, դեկտեմբերի 2–ին Փաշինյանը
հայտարարեց, որ ՌԴ նախագահ Վլադիմիր Պուտինը վերջին հեռախոսազրույցի ընթացքում առաջարկեց տեղափոխել ՀԱՊԿ գագաթնաժողովը, ինչին Փաշինյանը համաձայնվել է։
Սակայն դեկտեմբերի 4–ին ՌԴ նախագահի օգնական Ուշակովը լրագրողներին տեղեկացրեց, որ գագաթնաժողովը հետաձգվել է Հայաստանի խնդրանքով` հաշվի առնելով երկրում նախատեսված խորհրդարանական ընտրությունները։ Սակայն Փաշինյանի մամուլի քարտուղար Արման Եղոյանն ավելի ուշ հերքեց Ուշակովի հայտարարությունները։
Չորեքշաբթի ճեպազրույցի ժամանակ ՌԴ ԱԳՆ պաշտոնական ներկայացուցիչ Մարիա Զախարովան հայտարարեց, որ հաստատում է Ուշակովի հայտարարությունները և զարմացած է պաշտոնական Երևանի հայտարարությամբ։
Հայաստանի և ՀԱՊԿ երկրների հարաբերություններում լարվածություն առաջացավ այն բանից հետո, երբ Հայաստանը նախաձեռնեց և հոկտեմբերի 30–ին ՀԱՊԿ գլխավոր քարտուղարի պաշտոնից հետ կանչեց Յուրի Խաչատուրովին` նախօրոք չհամաձայնեցնելով այդ ընթացակարգերը կազմակերրպության մյուս գործընկերների հետ։ ՀԱՊԿ անդամ պետությունների ղեկավարները Աստանայում նոյեմբերի 8-ին քննարկել են նոր գլխավոր քարտուղարի հարցը: Հիշեցնենք, որ այդ հարցը արդիական է դարձել հոկտեմբերի 30-ին Հայաստանի ներկայացուցիչ Յուրի Խաչատուրովին այդ պաշտոնից ազատելուց հետո:–0–
