ԵՐԵՎԱՆ, 23 հունիսի. /Նովոստի–Արմենիա/. Թուրքական կողմը թույլ չի տվել գերմանական պատվիրակությանը մտնել ՆԱՏՕ–ի Ինջիրլիկ ռազմակայան։ Այս մասին հաղորդում է Spiegel online–ը` հղում անելով սեփական աղբյուրներին։
«Անկարան նշել է, որ այս պահին գերմանացի քաղաքական գործիչների ներկայությունը կայանում անցանկալի է», – գրում է Spiegel online–ը։ Պատվիրակության կազմում պետք է ներառվեին գերմանացի պատգամավորներ։ Նախատեսվում էր, որ պատվիրակությունը կգլխավորի ԳԴՀ ՊՆ–ի քարտուղար Ռալֆ Բրաուկզիպեն։
Այս միջադեպը ցույց է տալիս, թե որքան զայրացած է Թուրքիան Բունդեսթագում Հայոց ցեղասպանության բանաձևի ընդունման պատճառով, նշել է գերմանական պարբերականը։
Նրա տվյալներով` հենց սրա պատճառով է թուրքական կողմն արգելել պատվիրակության մուտքը ռազմակայան, տեղեկացրել է գեներալ–լեյտենանտ Դիտեր Վարնեկեն փակ դռների հետևում տեղի ունեցած Պաշտպանության խորհրդարանական կոմիտեի խորհրդակցության ժամանակ։
«Քաղաքական սկանդալ է ՊՆ քարտուղարի մուտքի արգելքը, ով համարվում է պաշտպանության նախարար Ուրսուլա ֆոն դեր Լյայենի տեղակալը», – գրել է Spiegel–ը։
Բունդեսթագը հունիսի 2–ին բացարձակ մեծամասնությամբ ընդունել է Օսմանյան կայսրությունում հայերի զանգվածային սպանությունները «ցեղասպանություն» որակող բանաձևը։ Դրանից հետո Անկարան հայտարարել է, որ «գործողությունների պլան» կձեռնարկի ԳԴՀ–ի նկատմամբ։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում