ԵՐԵՎԱՆ, 29 սեպտեմբերի./Նովոստի–Արմենիա/. The Guardian բրիտանական հրատարակությունը հրապարակել է հոդված, որում անդրադարձել է Սիրիայից թուրք վարձկանների թեմային, որոնք ուղարկվել են Ադրբեջան։
Ավելի վաղ Հայաստանը հայտարարել է, որ Ադրբեջանում Արցախի դեմ կռվում է մոտ 4 հազար սիրիացի գրոհային։
The Guardian–ը զրուցել է երեք տղամարդկանց հետ, ովքեր պատմել են, որ գրեթե տասը տարի տևած պատերազմն ու ծայրահեղ աղքատությունը դրդել են նրանց գրանցվել մարդկանց մոտ, ովքեր խոստացել են աշխատանք արտերկրում գործող թուրքական մասնավոր պահպանական ընկերությունում։
«Նրանք նախատեսում են հատել Թուրքիայի հետ սահմանը, մինչև Ադրբեջան տեղափոխվելը», – գրում է հրատարակությունը։
The Guardian–ը նաև հայտնում է, որ Իդլիբ սիրիական գավառի բնակիչները նշում են, որ հավաքագրումը սկսվել է մեկ ամիս առաջ։
«Ազազում բնակվող երկու եղբայրները` Մուհամադն ու Մահմուդը, ովքեր խնդրել են փոխել իրենց անունները` ելնելով էթնիկ նկատառումներից, պատմել են, որ սեպտեմբերի 13–ին նրանց կանչել են Աֆրինում գտնվող ռազմական ճամբար։ Այնտեղ Թուրքիայի աջակցությունը վայելող «Սուլթան Մուրադ» դիվիզիայի հրամանատարը տեղեկացրել է, որ Ադրբեջանում կա աշխատանք, պետք է զբաղվել դիտորդական դիրքերի և նավթագազային օբյեկտների պահպանությամբ, պայմանագիրը 3–6 ամիս է` ամսական 7000–10 000 թուրքական լիր (700–1000 ֆունտ ստեռլինգ)», – գրում է հրատարակությունը։
Նշվում է նաև, որ տղամարդիկ չգիտեն, թե ինչպես է կոչվում թուրքական պահպանական ընկերությունն ու ով է իրենց աշխատավարձ վճարելու։
«Մեր հրամանատարը մեզ ասաց, որ մենք չենք կռվելու, պարզապես օգնելու ենք պահպանել որոշ շրջաններ», – մեջբերվում են «ապստամբներից» մեկի խոսքերը։
The Guardian–ը նաև հայտնում է, որ դեկտեմբերից Անկարան նաև նպաստել է հազարավոր սիրիացի «ապստամբների» տեղափոխմանը Լիբիա` որպես վարձկաններ, որտեղ նրանք օգնել են կոտրել քաղաքացիական պատերազմի ընթացքը` հօգուտ ՄԱԿ–ի աջակցությունը վայելող կառավարական զորապետ Խալիֆ Հաֆթարի։
«Ինչպես Ադրբեջանի առաջարկի դեպքում, մի շարք տղամարդիկ, որոնք մեկնել են Լիբիա, հայտարարել են, որ նրանց առաջարկել են աշխատել որպես անվտանգության աշխատակիցներ, սակայն դրա փոխարեն նրանց ներգրավվել են առաջնագծում ընթացող ռազմական գործողությունների մեջ։ Շատերը նաև նշել են, որ հրամանատարները վերցնում էին իրենց աշխատավարձի 20%–ը», – հայտարարել է հրատարակությունը։
The Guardian–ը մեջբերում է նաև վարձկաններից մեկի խոսքերը, ով հայտարարել է, որ հիմա կան հազարավոր մարդիկ, ովքեր ուզում են մեկնել Լիբիա և Ադրբեջան։
«Սիրիական ազգային բանակի մի քանի աղբյուր նշում է, որ 500 սիրիացի գրոհայիններից բաղկացած առաջին խումբը, որը «Սուլթան Մուրադ» և «Ալ Համզա» դիվիզիաներից է, արդեն Ադրբեջանում է, նրանց թվում են երկու ավագ հրամանատարներ», – գրում է The Guardian–ը–ը`նշելով, որ չի կարողացել ստուգել այս տեղեկությունները։–0–