Փաշինյանը՝ Պոմպեոյին. Ադրբեջանն արհամարհում է ԼՂ հակամարտության խաղաղ կարգավորմանն ուղղված ԵԱՀԿ ՄԽ համանախագահների ջանքերը

ԵՐԵՎԱՆ, 27 հոկտեմբերի./Նովոստի-Արմենիա/. ՀՀ վարչապետ Նիկոլ Փաշինյանը հեռախոսազրույց է ունեցել ԱՄՆ պետքարտուղար Մայք Պոմպեոյի հետ, հաղորդում է վարչապետի մամուլի ծառայությունը:   

Վարչապետը զրուցակցի ուշադրությունը հրավիրել է Վաշինգտոնում ձեռք բերված հրադադարի մասին պայմանավորվածությունն Ադրբեջանի կողմից խախտելու փաստի վրա:

Նիկոլ Փաշինյանը նշել է, որ Ադրբեջանն արդեն երրորդ անգամ է, ինչ ոտնահարում է հրադադարի մասին պայմանավորվածությունը և դրանով իսկ արհամարհում հակամարտության խաղաղ կարգավորմանն ուղղված Մինսկի խմբի համանախագահների ջանքերը:

Ավելի վաղ հաղորդվել էր, որ Պոմպեոն Ադրբեջանի նախագահի և Նիկոլ Փաշինյանի հետ հեռախոսազրույցների ընթացքում կոչ է արել նրանց փնտրել ԼՂ հակամարտության դիվանագիտական լուծում: -0-