ԵՐԵՎԱՆ, 2 դեկտեմբերի․ /Նովոստի-Արմենիա/․ Գերիների վերաբերյալ ցանկերը անընդհատ թարմացվում են՝ հրապարակված տեսանյութերի և հարազատների ներկայացրած այլ ապացույցների հիման վրա: Այս մասին հայտնել է ԱՀ Մարդու իրավունքների պաշտպան Արտակ Բեգլարյանը։
«ԱՀ մարդու իրավունքների պաշտպանի աշխատակազմի գտած տեսանյութերից արդեն կարողացել ենք առանձնացնել գրեթե 60 ռազմագերի, որոնցից միայն փոքր մասի ինքնությունը դեռ չենք կարողացել պարզել»,- գրել է նա Facebook-յան իր էջում:
Загружается новость ... "Лево"
Օմբուդսմենը հայտնել է, որ տվյալները հավաքագրվում են նաև վկայությունների, զանգերի և այլ ապացույցների հիման վրա:
«Առանձին փաստահավաք գործունեություն ենք իրականացնում նաև ներկալված ու բռնի անհետացած քաղաքացիական անձանց մասով, որոնց թիվը հասնում է շուրջ 40-ի»,- նշել է Բեգլարյանը:
Նա նշել է, որ հավաքագրված բոլոր տվյալները պարբերաբար փոխանցվում են պետական ու միջազգային լիազոր մարմիններին՝ ակնկալելով արդյունավետ աշխատանք գերիների իրավունքների պաշտպանության ու վերադարձի ապահովման ուղղությամբ:
«Հատուկ համագործակցություն ունենք ՀՀ մարդու իրավունքների պաշտպանի և անհատ փաստաբանների հետ՝ տվյալների փոխանակման ու այլ համապատասխան գործընթացների հարցում»,- հայտնել է Օմբուդսմենը:
Նա հավելել է, որ պետք է հաշվի առնել, որ պետական լիազոր մարմինը պաշտպանության նախարարության գերիների ու անհայտ կորածների հարցերով հանձնաժողովն է, որին փոխանցվում են ունեցած տվյալները, ինչը նշանակում է, որ իրենք ունեն շատ ավելի համակողմանի ու ամբողջական տվյալներ՝ և՛ քանակի, և՛ ինքնության, և՛ այլ առնչվող ուղղություններով:-0-