ԵՐԵՎԱՆ, 27 օգոստոսի. /Նովոստի–Արմենիա/. Ադրբեջանը սպառնալիք է մնում Արցախի ժողովրդի գոյության համար, երեքշաբթի ասաց Հայաստանի արտաքին գործերի նախարար Զոհրաբ Մնացականյանը` ելույթ ունենալով ՀՀ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովում։
ՀՀ ԱԳ ղեկավարն ընդգծել է, որ, հանդես գալով ղարաբաղյան հակամարտության խաղաղ կարգավորման դիրքերից, Հայաստանը չի կարող ընդունել Ադրբեջանի կողմից ուժի կիրառման ակնհայտ կամ թաքնված սպառնալիքները և հրադադարի ռեժիմը պայմանական դարձնելու փորձերը։
Загружается новость ...
"Право"
«Ադրբեջանի ջանքերը լարված մթնոլորտում բանակցություններ վարելու ուղղությամբ խոչընդոտում են խաղաղության բարենպաստ պայմաններ ստեղծելուն, և, այդպիսով, չեն նպաստում խնդրի կայուն և համապարփակ լուծմանը։ Հայատյացության անփոփոխ քաղաքականությամբ Ադրբեջանը սպառնալիք է մնում Արցախի ժողովրդի գոյության համար։ Խաղաղությունն այլընտրանք չունի, Հայաստանի Հանրապետությունը և Արցախը բավարար ուժ ունի խաղաղություն ապահովելու համար»,– ասել է Մնացականյանը։
Նա հայտարարել է Ղարաբաղի շուրջ խաղաղ կարգավորման հարցում կարգավիճակի և անվտանգության առաջնահերթ նշանակության մասին։
«Հայաստանը չի կարող գնալ այնպիսի կարգավորման, որը կարող է կասկածի տակ դնել Արցախի ժողովրդի անվտանգությունը և սահմանափակել ինքնորոշման իրավունքի իրագործման հնարավորությունները»,– ասել է Մնացկանյանը։
Նա ընդգծել է, որ Արցախի ժողովրդի ինքնորոշման իրավունքը և ցանկացած պայմաններում մարդու անբաժան իրավունքները նաև ենթադրում են ազատ կամարտահայտում, որը ներառում է ազատ ընտրությունների անցկացում Արցախում և այդ ընտրությունների արդյունքում ձևավորված իշխանությունների ակտիվ մասնակցությունն այդ ընտրություններին։
«Եթե Ադրբեջանն իսկապես հետաքրքրված է հակամարտության խաղաղ կարգավորմամբ, ապա նա պետք է հավասարապես շահագրգռված լինի արցախյան ժողովրդի ընտրված ներկայացուցիչների հետ բանակցություններով»,– ասել է Մնացականյանը։ -0-