«Լուսավոր Հայաստանը» ՀՀ-ում ճգնաժամի լուծման ճանապարհային քարտեզ է ներկայացրել (ՎԻԴԵՈ)

ԵՐԵՎԱՆ, 14 նոյեմբերի./Նովոստի-Արմենիա/. «Լուսավոր Հայաստան» կուսակցությունը 13 կետերից բաղկացած ճանապարհային քարտեզ է ներկայացրել կարճ ժամանակահատվածի համար, որը կօգնի լուծել Հայաստանում ստեղծված իրավիճակից: Այս մասին, այսօր՝ նոյեմբերի 14-ին, Facebook-յան ուղիղ եթերում հայտնել է «Լուսավոր Հայաստան» խմբակցության ղեկավար Էդմոն Մարուքյանը:

«Շատ վատ փաստաթուղթ է ստորագրվել: Կարո՞ղ էր լինել ավելի վատ, այո, կարող էր: Այս պահին իրվիճակը կարող է հանգուցալուծել միայն իշխանությունը: 2018թ.-ի հեղափոխությունից հետո կային ցույցեր, պետական համակարգերը չէին աշխատում, բայց պետությունը ամուր էր: Այսօր նման ցնցումների դեպքում մենք կկորցնենք Հայաստանը: Դրա համար պետք է պարտության սիմվոլը հեռանա, որովհետեւ եթե չհեռանա անհնար է լինելու երկու կողմերի միջև եղած ատելությունը որեւէ ձեւի կառավարել: Լինելու են բախումներ»,-հայտարարեl 1 Մարուքյանը:

Նա կետ առ կետ ներկայացրել է իրավիճակից դուրս գալու՝ «Լուսավոր Հայաստանի» կազմած գործողությունների ծրագիրը.

«I. Պարտության սիմվոլ վարչապետը հեռանում է։

Խորհրդարանն ընտրում է ժամանակավոր վարչապետ։

Ձևավորվում է իրենց ոլորտներում հաջողության հասած մարդկանց անցումային կառավարություն:

II. Հայ-ռուսական հարաբերությունների բարձր որակի ապահովում

III. Հայաստանի, Ադրբեջանի և Ռուսաստանի միջև ստորագրված հայտարարության անորոշ դրույթների շուրջ բանակցությունների նախաձեռնում և վարում՝ հայանպաստ լուծումների հասնելու նպատակով: Արցախի ինքնորոշման իրավունքի վերջնական ամրագրման և կենսագործման, երկարաժամկետ կայունության և խաղաղության, հայկական շահը արտահայտող, հավասարակշռված համաձայնագիր ունենալու նպատակով՝ Մինսկի խմբի համանախագահների ձևաչափով բանակցությունների ընթացքի վերականգնում։

IV. Հայաստան-Արցախ-Սփյուռք ներուժի համախմբում

V. Ներքին իրավիճակի կայունացում, բախումների դադարեցում, հանրային համերաշխության վերականգնում, պառակտող գործողությունների, բռնության կոչերի, ատելության խոսքի բացառում։

VI. Պետական ինստիտուտների վերականգնում, ամրապնդում: Իրավապահ մարմինների աշխատանքի խիստ համակարգում, երկրում կարգուկանոնի ամրապնդում՝ հանրային անվտանգության վերականգնման ապահովման նպատակով։

VII. Զոհված և վիրավորված զինծառայողների ու նրանց ընտանիքների կարիքների պատշաճ ապահովում։

VIII. Արցախահայության (այդ թվում՝ փախստականների) սոցիալական կարիքների անհապաղ լուծում և կենսագործունեության պայմանների վերականգնում Արցախում։

IX. Կորոնավիրուսի դեմ պայքարի արդյունավետ համակարգում։

X. Միջազգային դոնորների համաժողովի հրավիրում՝ ԱՄՆ, Չինաստան, Ռուսաստան, ԵՄ 27 երկրներ, Իրան, արաբական երկրներ և այլն: Հայաստան-Արցախ ավիրված հատվածի վերականգնման համար առնվազն 1 մլրդ դոլար միջոցների ներգրավում:

XI. Հայկական դիվանագիտության թիմի աշխատանքների հիմնարար փոփոխություն, արտաքին քաղաքականության վերաիմաստավորում, նախաձեռնողական քաղաքականության վարում դաշնակից և այլ պետությունների հետ: Հայաստանի խախտված իրավունքների պաշտպանության նախաձեռնում միջազգային դատական ատյաններում:

XII. Տնտեսությունն ու բանակը վերականգնելու ազգային հեռանկարային ծրագրի մշակում, կայուն զարգացման ապահովում:

XIII. Ազատ, արդար ու թափանցիկ, հավասար պայմանների ապահովմամբ՝ խորհրդարանական ընտրությունների անցկացում»:-0-