ԵՐԵՎԱՆ, 19 հոկտեմբերի./Նովոստի-Արմենիա/. Լեռնային Ղարաբաղի ինքնորոշման իրավունքը մեզ համար ռազմավարական դեր ունի: Այս մասին ՏԱՍՍ գործակալության հետ զրույցում հայտնել է ՀՀ վարչապետ Նիկոլ Փաշինյանը:
Загружается новость ... "Лево"
Այս մասին վարչապետը հայտնել է ի պատասխան ՏԱՍՍ-ի հարցման, թե պատրա՞ստ է արդյոք Երևանը ԼՂ հակամարտության կարգավորումն սկսել Լեռնային Ղարաբաղի հարակից 7 շրջանները Ադրբեջանին փուլային ճանապարհով փոխանցելուց՝ Հայաստանի համար պահպանելով Լաչինի միջանցքը, մինչև Ղարաբաղի վերջնական կարգավիճակի որոշումը:
«Գիտեք, ես բազմիցս ասել եմ, և դա Հայաստանի՝ փաստացի բոլոր ժամանակների պաշտոնական դիրքորոշումն է, որ Լեռնային Ղարաբաղի ժողովրդի ինքնորոշման իրավունքը, այսինքն՝ Լեռնային Ղարաբաղի կարգավիճակը, մեզ համար ռազմավարական դեր ունի: Դուք ահա հիշատակեցիք մի տարբերակ: Ես գիտեմ, որ Հայաստանը մոտավորապես նմանատիպ մի լուծման պատրաստ է եղել մի քանի տարի առաջ: Այդտեղ, սակայն, մեկ նյուանս է եղել՝ իսկ ի՞նչ է լինելու Լեռնային Ղարաբաղի կարգավիճակի հետ: Այդ թվում նաև Կազանյան նախաձեռնությունը»,- նշել է Փաշինյանը:
«Բայց ցանկանում եմ ասել, որ այնքան էլ խելամիտ և պրագմատիկ չեմ համարում գնալ լուծման՝ կենտրոնանալով որոշ կարևոր կետերի վրա և ուշադրությունից դուրս թողնելով մյուս կարևոր կետերը: Պետք է հասկանալ, թե ինչպես է միևնույն կամ նմանատիպ հարցին պատասխանում Ադրբեջանը. իսկ պատրա՞ստ են արդյոք նրանք ճանաչել Լեռնային Ղարաբաղի ժողովրդի ինքնորոշման իրավունքը»,- հայտնել է վարչապետը:
Կազանյան նախաձեռնության մասին
2010 թ. հունիսի 24-ին Ռուսաստանի Դաշնության այն ժամանակվա նախագահ Դմիտրի Մեդվեդևի նախաձեռնությամբ և մասնակցությամբ Կազանում տեղի ունեցավ հանդիպում ՀՀ այն ժամանակվա նախագահ Սերժ Սարգսյանի և Ադրբեջանի ղեկավար Իլհամ Ալիևի միջև, որի ընթացքում նախատեսվում էր ղարաբաղյան հակամարտության կարգավորման հիմնարար սկզբունքների վերաբերյալ պայմանավորվածությունների ստորագրում: Ադրբեջանի նախագահի կողմից վերջին պահին 10 փոփոխությունների ներդրման պատճառով գագաթնաժողովն ավարտվեց ՝ առանց պայմանավորվածությունների հասնելու:-0-
