ԵՐԵՎԱՆ, 4 ապրիլի. / Նովոստի-Արմենիա/. Կրեմլը կոչ է անում Հայաստանին և Ադրբեջանին վերադառնանալ զինադադարի ռեժիմին: Այդ մասին, ինչպես հայտնում է ՏԱՍՍ-ը, հայտարարել է ՌԴ նախագահի մամուլի քարտուղար Դմիտրի Պեսկովը:
«Դուք գիտեք, որ ակտիվ ջանքեր են գործադրվում ինչպես Ռուսաստանի, Երևանի և Բաքվի, այնպես էլ համապատասխան միջազգային ինստիտուտների գծով: Այդ ջանքերը կշարունակվեն` առաջին հերթին զինադադարի ռեժիմին վերադառնալու նպատակով», - ասել է նա:
Պեսկովի խոսքով, այժմ առաջնահերթ խնդիրը հրադադարի ռեժիմի վերահաստատումն է: Բացի այդ, նա նշել է, որ անհրաժեշտ է «նվազագույնի հասցնել մարտական գործողությունների վերսկսման հետևանքով հակամարտության կարգավորման գործընթացին հասցվող վնասը»: Ընդ որում` Պեսկովը հրաժարվել է որևէ մեկնաբանություն տալ հակամարտության երկու կողմերին սպառազինության մատակարարումների վերաբերյալ, որոնք իրականացվում են կնքված համաձայնագրերի համապատասխան:
«Այս պահին ես կբացառեմ իմ կողմից այդ թեմայի վերաբերյալ մեկնաբանությունները» , - ասել է նա: Իրավիճակը Լեռնային Ղարաբաղում խորին մտահոգություն է առաջացնում Կրեմլում, հայտարարել է Պեսկովը: «Կրեմլում անհանգստացած են: Իրավիճակը իսկապես խորին մտահոգություն է առաջացնում Կրեմլում», - ասել է Պեսկովը:
Ռուսաստանը չի մեղադրում Թուրքիային Ղարաբաղում հակամարտության սրման համար. Լավրով >>
Պեսկովը չի մեկնաբանել Լեռնային Ղարաբաղում տիրող իրավիճակի պատասխանատվությունը Թուրքիայի վրա դնել փորձող մի շարք ռուս սենատորների հայտարարությունները,: «Ես զերծ կմնայի որևէ մեկնաբանությունից: Սա շատ զգայուն հարց է, որը պահանջում է շատ ուշադիր և զգույշ վերաբերմունք` թե´ գնահատականների, թե´ գործողությունների հարցում», - ասել է նա:
Ընդ որում` Պեսկովի խոսքով, Վլադիմիր Պուտինի, Սերժ Սարգսյանի և Իլխամ Ալիևի միջև որևէ հեռախոսազրույց առայժմ չի եղել: «Ոչ, առայժմ չի եղել: Ինչպես գիտեք, նախարարների մակարդակով ակտիվ երկխոսություն է ընթանում: Եթե որևէ շփում լինի, մենք ձեզ հաճույքով կտեղեկացնենք», - ասել է Պեսկովը:
Կրեմլի ներկայացուցիչը նաև նշել է, որ առայժմ խոսք չի գնում նաև Պուտինի և հակամարտող կողմերի միջև հանդիպման մասին, ինչպես կայացել էր Լեռնային Ղարաբաղում հակամարտության 2014 թ.-ի սրման պահին: «Առայժմ չեմ կարող պատասխանել, քանի որ ծրագրված համատեղ միջոցառումներ չկան», - ասել է նա` պատասխանելով այն հարցին, թե արդյո՞ք ծրագրվում է նմանատիպ հանդիպում:
«Ինչպես գիտեք, բարձրագույն մակարդակի հանդիպումներին նախորդում է շատ ծանր աշխատանք` ինչպես աշխատանքային, այնպես էլ` փորձագիտական մակարդակներում», - ասաց Պեսկովը:
Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով:
ԼՂՀ ՊՆ–ի մամուլի ծառայության հաղորդմամբ` ապրիլի 3-ի լույս 4-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդը ականանետերից ու հրանոթներից շարունակել է արկակոծել ՊԲ առաջնային դիրքերն ու մերձակա հայկական բնակավայրերը։ Ադրբեջանական զորքերն առավոտյան ժամը 07:00-ի սահմաններում առավել ինտենսիվ հրետակոծություններ են սկսել շփման գոտու հարավարևելյան և հյուսիսարևելյան ուղղություններով։
Հակառակորդի ագրեսիվ գործողությունները ճնշելու ուղղությամբ ՊԲ առաջապահ ուժերը ձեռնարկում են բոլոր անհրաժեշտ միջոցները և վստահաբար իրականացնում իրենց առջև դրված մարտական խնդիրները։ Օպերատիվ տվյալներով` մարտական գործողությունների ընթացքում ոչնչացվել է 2 ուղղաթիռ, շուրջ 20 տանկ, «Գրադ» տիպի 1 կայանք, 5 միավոր այլ զրահատեխնիկա, այդ թվում` 1 ԲՄՊ, 1 միավոր ինժեներական տեխնիկա և Ադրբեջանի ԶՈւ–ի 3 անօդաչու սարք։ Ադրբեջանական զինուժը տվել է 200-ից ավելի մարդկային կորուստ: Հայկական կողմը կորցրել է մեկ տանկ, ունի 18 զոհ, մոտ 40–ը վիրավոր է։ –0–