Կրեմլը չի մեկնաբանել ԼՂ հակամարտության կարգավորման աշխատանքային խումբ ստեղծելու մասին Էրդողանի առաջարկը, որն արվել է Պուտինին

ԵՐԵՎԱՆ, 9 նոյեմբերի./Նովոստի-Արմենիա/. Ռուսաստանը գործադրում է բոլոր հնարավոր ջանքերը Լեռնային Ղարաբաղում հակամարտության քաղաքական-դիվանագիտական կարգավորման համար: Այս մասին երկուշաբթի լրագրողների հետ զրույցում հայտնել է ՌԴ նախագահի մամուլի խոսնակ Դմիտրի Պեսկովը, հաղորդում է ՏԱՍՍ-ը:

«Ռուսական կողմը նախկինի պես շարունակում է բոլոր հնարավոր ջանքերը գործադրել քաղաքական-դիվանագիտական միջոցներով Լեռնային Ղարաբաղի շուրջ հակամարտության կարգավորման համար»,- հայտնել է Կրեմլի ներկայացուցիչը՝ պատասխանելով հարցին, թե կարող է արդյոք այդ հակամարտությունը ռազմական լուծում ունենալ:
ՌԴ նախագահի խոսնակը չի մեկնաբանել տեղեկատվությունն այն մասին, որ նոյեմբերի 7-ին կայացած հեռախոսզրույցի ժամանակ Էրդողանն առաջարկել է իր ռուս գործընկերոջը Լեռնային Ղարաբաղում իրավիճակի կարգավորման համար համատեղ աշխատանքային խումբ ստեղծել: Պեսկովի խոսքով, Կրեմլի մամուլի ծառայությունը նոյեմբերի 7-ին արդեն հայտնել է թեմաների մասին, որոնց շուրջ Պուտինն ու Էրդողանը զրուցել են:

«Այդ հաղորդագրությանն այլևս ավելացնելու ոչինչ չունեմ: Ղարաբաղի թեման իսկապես շոշափվել է»,- հայտնել է Պեսկովը:

«Նովոստի-Արմենիա» գործակալությունը ՀՀ Արտաքին գործերի նախարարություն է դիմել մեկնաբանության համար: -0-