Արցախի Դրախտիկ գյուղում Արցախյան թթվի փառատոն կկազմակերպվի
ՍՏԵՓԱՆԱԿԵՐՏ, 23 հոկտեմբերի. /Նովոստի–Արմենիա/. ԼՂՀ Հադրութի շրջանի Դրախտիկ գյուղում հոկտեմբերի 25-ին Արցախյան թթվի փառատոն կկազմակերպվի, հայտնում է ԼՂՀ մշակույթի եւ երիտասարդության հարցերի նախարարության մամուլի ծառայությունը:
Ինչպես նշված է հաղորդագրության մեջ, փառատոնի ավելի քան 50 տաղավարներում համտեսի և վաճառքի կներկայացվեն Դրախտիկի և Հադրութի շրջանի ևս 16 գյուղերի ավանդական թթվի հարուստ տեսականի, ինչպես նաև արցախյան խոհանոցի այլ ուտեստներ:
Փառատոնին կներկայացվեն նաև արցախյան մշակութային արժեքների, ավանդական արհեստների և կենցաղի ցուցադրություններ, ազգագրական պարեր: Ազգային նվագարաններով ու ժողովրդական երգ ու նվագով հանդես կգան Հադրութի «Դիզակ» համույթը, երաժիշտներ ու երգիչներ Ստեփանակերտից:
Փառատոնի կազմակերպիչները նշում են, որ միջոցառման նպատակը դարերից եկող ազգային ավանդույթները արժևորելն ու դրանք սերնդեսերունդ փոխանցելն է, ինչպես նաև բնության բարիքներից օգտվելու՝ հադրութցու բազմաշնորհ տաղանդը ներկայացնելը: Այն նաև մշակութային ժառանգության, մասնավորապես, ոչ նյութական մշակութային ժառանգության մաս կազմող արցախյան խոհանոցի, ժողովրդական բանահյուսության, բարբառի և ենթաբարբառների պահպանման և հանրահռչակման նպատակ ունի:-0-
