ԵՐԵՎԱՆ, 30 նոյեմբերի. /Նովոստի-Արմենիա/. Ադրբեջանական կողմն արժանի պատասխան կստանա Լեռնային Ղարաբաղի Հանրապետության նկատմամբ ցանկացած ոտնձգության դեպքում, հայտարարել է ԼՂՀ պաշտպանության նախարար Մովսես Հակոբյանը:
Նոյեմբերի 19-20-ին Ղարաբաղում ադրբեջանական կողմից դիպուկահարների կրակի հետևանքով զոհվել են ԼՂՀ Պաշտպանության բանակի ժամկետային երկու զինծառայողներ՝ Արեն Սիմոնյանը և Միհրան Մարգարյանը:
«Այդպիսի դեպքերում հակառակորդը միշտ արժանի պատիժ կստանա և կհասկանա, որ Լեռնային Ղարաբաղի հետ նման ոճով բանակցություններ վարելը կամ խոսելն անիմաստ է»,- նախօրեին լրագրողներին է ասել Հակոբյանը՝ ԼՂՀ պաշտպանության բանակի մոտոհրաձգային առանձին գնդի ստեղծման 20-ամյակին նվիրված միջոցառման ավարտին:
Ըստ նրա՝ ադրբեջանցի դիպուկահարների աշխատանքն առաջնային գծում երբեք խնդիր չի եղել և չի լինի ղարաբաղյան բանակի հրամանատարության և անձնակազմի համար:
Ղարաբաղի պաշտպանության նախարարը նշել է, որ ԵԱՀԿ Մինսկի խմբի համանխագահները, ովքեր զբաղվում են ադրբեջանաղարաբաղյան հակամարտության կարգավորման գործընթացով, միանշանակ պատասխանատվություն են կրում և պետք է համապատասխան միջոցներ ձեռնարկեն հետագայում նմանատիպ դեպքերի բացառման համար:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
