Ղարաբաղում շախմատը կընդգրկվի դպրոցական ծրագրի մեջ

Առաջիկայում շախմատը կդասավանդվի ԼՂՀ դպրոցներում որպես պարտադիր առարկա, հաղորդում է Արցախի հանրային հեռուստաընկերությունը:

Հայաստանում այս ուսումնական տարվանից շախմատը դասավանդվում է հանրապետության բոլոր դպրոցներում՝ 2-4-րդ դասարաններում: Ղարաբաղում նմանատիպ ծրագրի իրագործման համար պետք է լիամասշտաբ աշխատանքներ իրականացվեն՝ առաջին հերթին համապատասխան կադրերի պատրաստման ուղղությամբ:

ԼՂՀ կրթության և գիտության նախարարությունում հույս են հայտնել, որ այս ծրագիրը կգործի հաջորդ ուսումնական տարվանից, իսկ հիմա շախմատը փորձնական կարգով դասավանդվում է միայն Ստեփանակերտի թիվ 1 դպրոցում:

Շախմատի ուսուցիչ Արթուր Բաբայանի (Ղարաբաղի միակ ներկայացուցիչը, ով վերապատրաստման կուրս է անցել Հայաստանում) խոսքերով՝ «շախմատ» առարկան  հինգ դասարաններից ուսումնասիրում են երկրորդ դասարանի 158 աշակերտներ:

Նա տեղեկացրեց, որ շախմատի դասասենյակն ապահովված է Հայաստանի շախմատի ֆեդերացիայի կողմից ընծայված անհրաժեշտ գույքով, բոլոր աշակերտներն ունեն դասագրքեր և աշխատանքային տետրեր, որոնք հրատարակվել են Հայաստանի շախմատի ակադեմիայի կողմից:

Հայաստանի շախմատի ֆեդերացիայի փոխնախագահ Սմբատ Լպուտյանն իր հերթին հայտարարել է, որ Հայաստանում մոտավորապես երկու ամսվա ընթացքում վերապատրաստում է անցել շախմատի շուրջ 1215 ուսուցիչ:

Նա վստահություն է հայտնել, որ Հայաստանում այս ծրագրի իրագործումը նոր խթան կդառնա շախմատի զարգացման համար և օրինակ կդառնա ողջ աշխարհի համար:-0-