Բաքուն չի կարող վախեցնել Արցախին տեղեկատվական հիստերիայով. ԼՂՀ նախագահ

ԵՐԵՎԱՆ, 28 սեպտեմբերի. /Նովոստի-Արմենիա/. Ադրբեջանի տեղեկատվական գրոհները հիստերիկ բնույթ են կրում և չեն կարող հոգեբանական ճնշում գործադրել Ղարաբաղի վրա, ասաց Լեռնային Ղարաբաղի Հանրապետության նախագահ Բակո Սահակյանը Ռուս-Հայկական (Սլավոնական) համալսարանի Գիտական խորհրդի՝ ԼՂՀ անկախության 20-ամյակին նվիրված ընդլայնված նիստի ընթացքում:

Նա նշեց, որ ներկայում տեղեկատվական գրոհներից Ղարաբաղի պաշտպանվածության աստիճանը միջին է:
«Մենք, անշուշտ, համապատասխան աշխատանքներ ենք տանում, և ժամանակակից տեխնոլոգիաների կիրառումը թույլ կտա պաշտպանվածության աստիճանն ավելի բարձր մակարդակի հանել»,- ասաց նախագահը:

Նա միաժամանակ նշեց, որ ցանկացած բնագավառում հաջողության հասնելու համար պրոֆեսիոնալ գիտելիքներ են պետք:
«Գլխավորը՝ ամեն ինչ հոգով անել, որովհետև, երբ հոգի է դրվում, ապա ցանկացած խնդիր ակնթարթորեն է լուծվում»,- ասաց Սահակյանը: -0-