Լեռնային Ղարաբաղի ընտրությունները չեն ազդի հակամարտության խաղաղ կարգավորման վրա. ՌԴ ԱԳՆ

Լեռնային Ղարաբաղի ընտրությունների անցկացումը չի կարող ազդել հակամարտության խաղաղ կարգավորման ընթացքի վրա, հինգշաբթի հայտնել է ՌԴ ԱԳՆ պաշտոնական ներկայացուցիչ Ալեքսանդր Լուկաշևիչը:

2011թ.-ի սեպտեմբերի 18-ին Լեռնային Ղարաբաղում տեղական ինքնակառավարման մարմինների ընտրություններ են անցկացվել:
«Ինչպես հայտնի է, Ռուսաստանը չի ճանաչում «Լեռնային Ղարաբաղի Հանրապետությունը» որպես անկախ պետություն: Կարծում ենք, որ Լեռնային Ղարաբաղի ընտրությունների անցկացումը չի կարող ազդել հակամարտության խաղաղ կարգավորման ընթացքի վրա»,- նշվում է ՌԴ ԱԳՆ կայքում տեղադրված Լուկաշևիչի մեկնաբանությունում:

Փաստաթղթում նաև ասվում է, որ «Ռուսաստանը ԵԱՀԿ Մինսկի խմբի համանախագահ գործընկերների՝ ԱՄՆ-ի և Ֆրանսիայի հետ ունեցած սերտ գործակցությամբ ակտիվ միջնորդական ջանքեր է գործադրում ղարաբաղյան հիմնախնդրի կարգավորման գործում»:
«Շարունակելու ենք աջակցել ադրբեջանական և հայկական կողմերին՝ ղարաբաղյան հանգույցը փոխզիջումային տարբերակով լուծելու նպատակով: Հաստատում ենք ինչպես տարածքային ամբողջականության, ուժ չգործադրելու սկզբունքների, այնպես էլ այլ հիմնարար սկզբունքների և միջազգային իրավունքի նորմերի աջակցությունը»,- նշվում է ՌԴ ԱԳՆ հաղորդագրության մեջ:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-