Ղարաբաղի խորհրդարանը ԼՂՀ հռչակման 20-ամյակի կապակցությամբ համաներում հայտարարելու մասին որոշում է ընդունել

ԵՐԵՎԱՆ, 31 օգոստոսի. /Նովոստի-Արմենիա/. ԼՂՀ Ազգային ժողովը երեքշաբթի կայացած արտահերթ նիստի ընթացքում համաներում հայտարարելու մասին որոշում է ընդունել սեպտեմբերի 2-ին նշվող ԼՂՀ հռչակման 20-ամյակի կապակցությամբ, «Նովոստի-Արմենիա» գործակալությանը տեղեկացրեցին ԼՂՀ խորհրդարանի մամուլի ծառայությունից:

Մամուլի հաղորդագրության համաձայն՝ համաներմամբ ազատ կարձակվի դատապարտյալների շուրջ 25 տոկոսը: Բացի այդ, պատիժը կրելուց կազատվեն ազատազրկման հետ կապ չունեցող պատժի տարբեր տեսակների դատապարտված անձինք: Կարճման ենթական քրեական և դատական գործերի թիվը տատանվում է 60-80 տոկոսի սահմաններում:

Ինչպես արտահերթ նիստի ընթացքում հայտարարեց ԼՂՀ խորհրդարանի խոսնակ Աշոտ Ղուլյանը, սեպտեմբերի 2-ը հաշվարկի այն կետն է, որից սկսվում է Արցախի նորագույն պատմությունը:

«Ամփոփելով 20 տարվա ընթացքում գրանցված մեր բոլոր հաջողությունները, ձեռքբերումներն ու բացթողումները՝ ցանկանում եմ նշել, որ ԼՂՀ-ն կայացած, ինքնավար, հասուն և ժողովրդավարական պետություն է, որն ամբողջովին արժանի է միջազգային ճանաչման», - ասել է Ղուլյանը:-0-