ՌԴ ԱԳՆ ղեկավարը հանդիպել է ղարաբաղյան կարգավորման ԵԱՀԿ ՄԽ համանախագահների հետ

ԵՐԵՎԱՆ, 11 հուլիսի. /Նովոստի-Արմենիա/. ՌԴ արտգործնախարար Սերգեյ Լավրովն, ավելի վաղ ձեռք բերված պայմանավորվածության  համաձայն, ընդունել է ղարաբաղյան կարգավորման ԵԱՀԿ Մինսկի խմբի համանախագահներ Բեռնար Ֆասյեին (Ֆրանսիա), Ռոբերտ Բադտկեին (ԱՄՆ) և Իգոր Պոպովին (Ռուսաստան), ինչպես նաև ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկին, հաղորդում է ՌԴ ԱԳՆ մամուլի ծառայությունը։

«Խորհրդակցությունների ընթացքում քննարկվել են ՄԽ համանախագահ երկրների աշխատանքի հետագա համակարգման հարցերը՝ հաշվի առնելով ղարաբաղյան կարգավորման եռակողմ գագաթնաժողովի արդյունքները, որը տեղի է ունեցել հունիսի 24-ին Կազանում, ինչպես նաև բանակցային գործընթացքում միջնորդի կարգավիճակում Ռուսաստանի, ԱՄՆ-ի և Ֆրանսիայի կողմից ձեռնարկվելիք հետագա ջանքերը»,- ասվում է հաղորդագրության մեջ։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց հետևանքով երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-