Կանադան կասեցրել է կանադական տեխնոլոգիաներով բաղադրիչների արտահանումը Թուրքիա

ԵՐԵՎԱՆ, 6 հոկտեմբերի․ /Նովոստի-Արմենիա/․ Կանադայի արտաքին գործերի նախարար Ֆրանսուա-Ֆիլիպ Շամպայնը երկուշաբթի հայտարարություն է տարածել՝ կապված կանադական տեխնոլոգիաներով բաղադրիչներ Թուրքիա արտահանելու արգելքի հետ: Այդ մասին հայտնում է www.canada.ca- ն :

«Վերջին օրերին արվել են որոշակի հայտարարություններ՝ կապված Լեռնային Ղարաբաղի ռազմական հակամարտությունում կանադական տեխնոլոգիաների օգտագործման հետ», - ասել է նա:

Շամպայնը նշել է, որ այդ մասին իմանալով՝ ինքը հանձնարարել է Արտաքին գործերի նախարարությանը կատարել համապատասխան հետաքննություն:

«Համաձայն Կանադայի արտահանման վերահսկման խիստ ռեժիմի և ընթացիկ ռազմական գործողությունների հետ կապված՝ ես կասեցրել եմ համապատասխան արտահանման թույլտվությունները Թուրքիա, որպեսզի ժամանակ ստանամ իրավիճակի հետագա գնահատման համար», - ասել է արտգործնախարարը:

Նա ասել է, որ Կանադան շարունակում է անհանգստանալ Լեռնային Ղարաբաղում շարունակվող հակամարտությամբ, ինչը հանգեցնում է բնակավայրերի հրթիռակոծման և խաղաղ բնակիչների զոհերի:

«Մենք կոչ ենք անում անհապաղ միջոցներ ձեռնարկել տեղում իրավիճակը կայունացնելու համար և կրկին հայտնում ենք, որ բանակցությունների միջոցով այս հակամարտության խաղաղ կարգավորումը այլընտրանք չունի», - ասել է Շամպայնը:-0-