ԵՐԵՎԱՆ, 16 մայիսի . /Նովոստի-Արմենիա/. Իտալացի լուսանկարիչ–վավերագիր, հեղինակավոր պարբերականների արտահաստիքային ֆոտոթղթակից Էմանուելե Ամիղեթին Արցախի այցի ընթացքում լուսանկարել է տեղի բնակիչների և առաջնագծի զինվորների կյանքը։
Լուսանկարահանումն իրականացվել է 2016 թվականի ապրիլյան պատերազմից համարյա մեկ տարի անց։
«Իմ ժամանումից մի քանի օր առաջ երիտասարդ արցախցի մի զինվոր հրազենային վնասվաքծներ էր ստացել ադրբեջանական դիպուկահարների գնդակոծման հետևանքով։ Նրան տեղափոխեցին Երևանի հիվանդանոց, և նրա կյանքն առաջվա պես վտանգված է։ Ադրբեջանական և հայկական ուժերի միջև բախումը Լեռնային Ղարաբաղում տարածաշրջանում 1994 թվականի հրադադարից հետո առաջին ամենալուրջ էսկալացիան էր»,– հոդվածում գրել է Ամիղեթին։
Ֆոտոլրագրողը նկարագրել է 2016 թվականի սարսափազդու իրադարձությունները, երբ ադրբեջանական ուժերը ներխուժել են Թալիշ, սպանել չորս ծերերի և կտրել նրանց ականջները։ «Այս ամենի հետքերը դեռ կան, եթե անցնեք ավերված տների, խանութների և դպրոցների մոտով։ Տեղի բնակիչները տարհանվել են հարակից գյուղեր, որտեղ գտել են հարազատներին և հարևաններին։ Սահմանակից տարածքն այժմ լի է ռազմական ճամբարներով և բազաներով, որոնք ապացուցում են, որ մարտական կյանքը դեռ շարունակվում է»,– նշել է Ամիղեթին։
Ստեփանակերտում, նրա խոսքով, Զինվորական ակադեմիան փոխարինում է ավանդական միջնակարգ դպրոցը, որտեղ 13-18 տարեկան դեռահասներն ուսումնասիրում են մաթեմատիկա, պատմություն և անգլերեն` ֆիզիկական վարժություններից և երթերից հետո։
«Գործազրկությունը բարձր է, աշխատավարձերը` ցածր, հնարավորությունները փոքր են։ Երիտասարդները շարունակում են մեկնել արտերկիր լավագույն ապագայի որոնումներով։ 18 տարեկան լրանալուն պես երիտասարդ արցախցիները զորակոչվում են։ Ահա ինչ է նշանակում հակամարտության գոտում ապրելը»,– գրել է նա։
Էմանուելե Ամիղեթիի աշխատանքները հրապարակվում են WIRED, VICE, POLITICO Europe Magazine, PDN, Panorama, Pagina 99, The Towner, OpenMigration ամսագրերում։ -0-