ԵՐԵՎԱՆ, 10 հոկտեմբերի./Նովոստի–Արմենիա/. Հումանիտար հրադադար է հաստատվելու ղարաբաղյան հակամարտության գոտում Մոսկվայում կայացած Հայաստանի, Ռուսաստանի և Ադրբեջանի ԱԳ նախարարներ Զոհրաբ Մնացականյանի, Սերգեյ Լավրովի և Ջեյհուն Բայրամովի եռակողմ հանդիպման արդյունքում։
Լավրովն ընթերցեց փաստաթուղթը, որը համաձայնեցվել է երկարատև բանակցություններից հետո։
«Ի պատասխան Ռուսաստանի Դաշնության նախագահ Վ.Վ.Պուտինի ուղերձի և համապատասխան Ռուսաստանի Դաշնության նախագահ Վ.Վ.Պուտինի, Հայաստանի Հանրապետության վարչապետ Ն.Վ.Փաշինյանի և Ադրբեջանի Հանրապետության նախագահ Ի.Հ.Ալիևի պայմանավորվածությունների` կողմերը համաձայնեցին ստորև ներկայացված քայլերի շուրջ.
1. 2020թ. հոկտեմբերի 10-ի ժամը 12:00-ից մարդասիրական նպատակներով հայտարարվում է կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար` Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։
2. Կրակի դադարեցման հստակ պարամետրերը կհամաձայնեցվեն հավելյալ։
3.Հայաստանի Հանրապետությունը և Ադրբեջանի Հանրապետությունը, ԵԱՀԿ Մինսկի խմբի համանախագահների միջնորդությամբ, կարգավորման հիմնարար սկզբունքների հիման վրա ձեռնամուխ են լինելու առարկայական բանակցությունների` խաղաղ կարգավորմանը շուտափույթ հասնելու նպատակով։
4.Կողմերը վերահաստատում են բանակցային գործընթացի ձևաչափի անփոփոխությունը»,- հայտարարեց Լավրովը։
Հոկտեմբերի 8–ին հրապարակվել է ՌԴ նախագահ Վլադիմիր Պուտինի հայտարարությունը, ով կոչ է արել կողմերին դադարեցնել կրակը Արցախում` գերիներին փոխանակելու և զոհերի մարմինները տեղափոխելու համար։ Պուտինը նաև հրավիրել է Հայաստանի և Ադրբեջանի ԱԳ նախարարներին Մոսկվա` հոկտեմբերի 9–ին խորհրդակցություններ անցկացնելու նպատակով։–0–