Հայտնի է Արցախի նոր Օմբուդսմենի թեկնածությունը. թերթ

ԵՐԵՎԱՆ, 4 մայիսի. /Նովոստի–Արմենիա/. Արդարադատության ակադեմիայի ռեկտոր Ռուբեն Մելիքյանը կարող է զբաղեցնել Լեռնային Ղարաբաղի Հանրապետության Օմբուդսմենի պաշտոնը, գրում է «Հայկական ժամանակ» թերթը։

Ապրիլի վերջում հայտնի էր դարձել, որ Լեռնային Ղարաբաղի Հանրապետության Օմբուդսմեն Յուրի Հայրապետյանը հրաժարականի դիմում է ներկայացրել։

Պարբերականը նշում է, որ Մելիքյանը նախօրեին Արցախում հանդիպել է խորհրդարանական խմբակցությունների ներկայացուցիչների հետ։

Պատասխանելով թերթի թղթակցի այն հարցին, թե իսկապես ինքը դառնալու է Ղարաբաղի Օմբուդսմեն` Մելիքյանն ասել է, որ չի կարող պաշտոնապես դա հաստատել։

Նա նշել է նաև, որ ներկայում արձակուրդի մեջ է։

«ԼՂՀ–ի «Հայրենիք» խորհրդարանական խմբակցության ղեկավար Արթուր Թովմասյանը հաստատել է, որ խորհրդարանում Մելիքյանի հետ հանդիպումներ են անցկացվում և որ մայիսի 5–ին կքննարկվի Օմբուդսմենի թեկնածությունը»,– գրում է թերթը։ -0-