ԵՐԵՎԱՆ, 24 հոկտեմբերի․/Նովոստի-Արմենիա/․ Աշխարհում ցեղասպանության վտանգի գնահատմամբ զբաղվող հեղինակավոր Genocide Watch կազմակերպությունը հանդես է եկել զեկույցով, որում հաղորդվում է Ադրբեջանի Զինված ուժերի կողմից Արցախի բնակիչների դեմ ցեղասպանության իրականացման սպառնալիքի մասին։
Загружается новость ... "Лево"
««Ադրբեջանն օգտագործում է Թուրքիայի և Իսրայելի կողմից մատակարարվող անօդաչու թռչող սարքեր հայկական զորքերի, գյուղերի և քաղաքացիական բնակչության խոցման համար: Քաղաքացիական բնակչության վրա ադրբեջանական ռազմական հարձակումները, Ժնևյան կոնվենցիաներին համապատասխան, ռազմական հանցագործություններ են»,- նշվում է հաղորդագրության մեջ։
Նշվում է, որ ՄԱԿ-ը, Ռուսաստանը և Կարմիր խաչի միջազգային կոմիտեն հրադադարի կոչ են արել, բայց նրանց կոչերը չեն լսվել։
«Անցյալում Հայոց ցեղասպանության ժխտման, ատելության պաշտոնական լեզվի կիրառման և Արցախի քաղաքացիական բնակչության վրա ներկայիս հարձակումների պատճառով, Genocide Watch-ը կարծում է, որ Ադրբեջանը գտնվում է 9-րդ՝ բնաջնջում և 10-րդ՝ ժխտողականություն աստիճանների վրա»,- հաղորդվում է հայտարարության մեջ:
Genocide Watch-ի զեկույցում հիշատակվում է ոչ միայն Օսմանյան Թուրքիայում Հայոց ցեղասպանությունը, այլև 1918-1920թթ․-ին Բաքվում և Ղարաբաղում հայերի զանգվածային ջարդերը, 1988-1990թթ․-ին Սումգայիթում, Բաքվում և Ղարաբաղում էթնիկ զտումմները։
Իրավիճակը հաշվի առնելով, կազմակերպությունը համարում է, որ․
1․ ՄԱԿ-ի Անվտանգության խորհուրդը պետք է Ադրբեջանից պահանջի դադարեցնել Արցախի Հանրապետության դեմ ռազմական գործողությունները և հաստատի զինադադար այդ հակամարտության մեջ։
2․ Անվտանգության խորհուրդը պետք է ՄԱԿ գլխավոր քարտուղարից և ԵԱՀԿ Մինսկի խմբից պահանջի Ադրբեջանի և Հայաստանի միջև հակամարտության լուծում։
3․ Անվտանգության խորհուրդը պետք է Ադրբեջանին զենքի վաճառքի էմբարգո ներդնի։
4․ Պետք է ձևավորել ՄԱԿ խաղաղապահ ուժեր և տեղակայել շփման գծի երկայնքով՝ արցախահայերի վրա Ադրբեջանի հարձակումները բացառելու համար։
5․ Համաշխարհային առաջնորդները պետք է դատապարտեն ատելության հռետորաբանությունը և Իլհամ Ալիևի ռեժիմի կողմից ցեղասպանության հերքումը։ -0-