ԵՐԵՎԱՆ, 13 հոկտեմբերի./Նովոստի-Արմենիա/. Ռուս լրագրող և բլոգեր, Сегодня.ру պորտալի գլխավոր խմբագիր Յուրի Կոտյոնոկը «Комсомольской правда» թերթին պատմել է, թե ինչպես է հայտնվել ադրբեջանական գրոհի տակ Շուշիի Սուրբ Ղազանչեցոց տաճարում:
Հիշեցնենք, որ հոկտեմբերի 8-ին ադրբեջանական ԶՈւ-երը երկու անգամ հարված են հասցրել Սուրբ Ղազանչեցոց եկեղեցուն Շուշիում: Գրոհի հետևանքով եկեղեցու շինությունը լուրջ վնասներ է կրել, վրավորումներ են ստացել տեղի բնակիչները, այդ թվում երեք ռուս լրագրող:
Արկն ընկել է տաճարի գմբեթի վրա, երբ լրագրողները ներսում են եղել: Նրանցից մեկը՝ Յուրի Կոտյոնոկը ծանր վիրավորում է ստացել, իսկ Լևոն Արզանովին և Հրանտ Բադալյանին տարել են Շուշիի հիվանդանոց;
Կոտյոնոկին միանգամից ուղարկել են Ստեփանակերտ: Մի քանի վիրահատություններից հետո նրան տեղափոխել են ուղղաթիռով Երևանի «Էրեբունի» ԲԿ, վերակենդանացման բաժանմունք: Բժիշկները նրա վիճակը ծանր, բայց կայուն են գնահատել:
«Մենք մեզ հետ սաղավարտ կամ զրահ չվերցրեցինք, որոշեցինք, որ Ստեփանակերտում մեզ ապահովելու են պաշտպանական միջոցներով: Ճանապարհին մենք իմացանք Շուշիի տաճարին հասցված հարվածի մասին: Այդպես էլ եկանք: Ես հեռախոսով էի նկարում, որը ավիառեժիմի վրա էի դրված, բայց ինչ-որ կերպ դա ֆիքսվել էր: Իմ ենթադրությունն այն է, որ նրանք հարվածել են հեռախոսի ազդանշանով: Մոտ 20 րոպե մենք այնտեղ քայլում էինք, նկարահանում էինք վնասված սրբապատկերները »,- նշել է նա:
Նա հիշում է գրոհի պահը:
«Սարսափելի հարված էր: Երկիրը պատռվեց: Ես արդեն մտածում էի, որ սպանված եմ: Փորձում էի աղոթել, ուշքի եկա, սկսեցի վեր կենալ: Իմ կողքին երկրորդ ռազմական թղթակիցն էր՝ Լևոն Արզանովը: Ես կանչում էի՝ «Լյո՛վա, Լյո՛վա»: Շուրջբոլորս խիտ մառախուղ էր: Մարդիկ հասան դեպքի վայր, սկսեցին ինձ հանել: Մեքենայով ինձ հիվանդանոց էր տանում մի քահանա, աղոթում էր ինձ համար: Հետո ես ուշագնաց եմ եղել: Իսկ արթնացել եմ արդեն այստեղ»,- պատմում է լրագրողը:
Նա ենթադրել է, որ ադրբեջանցիները հատուկ են սպասում, որ տաճարում ժողովուրդ հավաքվի, և հարվածում են:
«Ես նման դաժանություն անգամ Չեչնիայում չեմ հանդիպել»,- ասել է նա՝ կոչ անելով այնտեղ աշխատող իր գործընկերներին ավելի զգույշ լինել:
«Հաշվարկեք ամեն բան: Եվ նվազագույնի հասցրեք ձեզ մոտ եղած հավելվածները: Տեխնոլոգիաները այն մակարդակի են հասել, որ հարվածել կարող են անհատապես»,- նշել է լրագրողը: -0-