ԵՐԵՎԱՆ, 22 հունիսի. /Նովոստի-Արմենիա/. Արցախի խորհրդարանի խոսնակ Աշոտ Ղուլյանը համարում է, որ ժամանակն է դիտարկել ԵԱՀԿ Մինսկի խմբի կազմից Թուրքիան հանելու հարցը:
«Ակնհայտ է, որ Թուրքիան շատ է օգնում Ադրբեջանի բանակի վերազինմանն ու վերապատրաստմանը: Թուրք-ադրբեջանական համատեղ զորավարժությունները հաստատում են, որ հայկական կողմերի դիրքորոշումն առ այն, որ Թուրքիան չի կարող անկողմնակալ միջնորդ հանդիսանալ ադրբեջանա-ղարաբաղյան հակամարտության կարգավորման գործում, լիովին հիմավոր է»,- ասել է Ղուլյանն
«Առավոտ» թերթին տված հարցազրույցում:
Նման իրավիճակում, ինչպես նշել է Արցախի ԱԺ խոսնակը, գուցե, ամենահարմար պահն է, որպեսզի հայկական կողմից բարձրացվի Թուրքիային Մինսկի խմբի անդամ երկրների կազմից հանելու հարցը
Վաշինգտոնյան հանդիպում
Ղուլյանը մեկնաբանել է նաև հունիսի 20-ին Վաշինգտոնում կայացած Հայաստանի և Ադրբեջանի ԱԳ ղեկավարների հանդիպումը ԵԱՀԿ Մինսկի խմբի համանախագահների մասնակցությամբ:
«Վաշինգտոնյան հանդիպումը պետք է դիտարկել նախորդ հանդիպումները` Մոսկվա և Փարիզ, շարունակելու տրամաբանության մեջ: ԵԱՀԿ ՄԽ համանախագահ երկրները ձգտում են հավասարակշռություն պահպանել ադրբեջանա-ղարաբաղյան հիմնախնդրի լուծմանն ուղղված բանակցությունների նախաձեռնություններում, և այս փուլում առաջատարի դերակատար առանձնացնելը տեղին չէ»,- կարծում է նա:
Իհարկե, նշել է Ղուլյանը, համանախագահող երկրներից յուրաքանչյուրը Հարավային Կովկասում ունի սեփական աշխարհաքաղաքական հետաքրքրությունները, սակայն պետք է ընդգծենք, որ ԱՄՆ-ի, ՌԴ-ի և Ֆրանսիայի շահերը տարածաշրջանում կայունության պահպանման հարցում համընկնում են, ինչը շատ կարևոր գործոն է հիմնախնդրի լուծման համար:
Հակամարտության պատմությունը
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։ 1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։
Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։ Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ` հակամարտության խաղաղ կարգավորման ուղղությամբ` ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան։-0-