ԵՐԵՎԱՆ, 13 հունիսի. /Նովոստի-Արմենիա/. Լեռնային Ղարաբաղի հետ շփման գծում ռազմական գործողությունները վերսկսելու համար Ադրբեջանն այժմ ավելի շատ նախադրյալներ ունի, քան ապրիլի սկզբին, երկուշաբթի լրագրողներին ասաց քաղաքագետ Հրանտ Մելիք-Շահնազարյանը:
Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։
Սպիտակ տունը պատասխանել է Ադրբեջանի հակաղարաբաղյան խնդրագրին>>
«Այս պահին չկա ոչ մի նախադրյալ ենթադրելու համար, որ Ադրբեջանի իշխանությունը փոխել է ԼՂՀ-ի ՊԲ-ի հետ շփման գծում իր ռազմավարությունը: Մինչ օրս համաշխարհային հանրությունը Ադրբեջանի զսպման ոչ մի մեխանիզմ չի գործարկել», - հայտնեց Մելիք-Շահնազարյանը:
Սահմանին տիրող հարաբերական անդորրը, քաղաքագետի կարծիքով, ժամանակավոր բնույթ է կրում և բացատրվում է մի քանի գործոններով: «Նախևառաջ, այժմ Ադրբեջանը փորձում է ժողովրդավարական երկիր լինել, համաշխարհային հանրության աչքերում ցույց տալ իր «կառուցողականությունը»: Երկրորդ` դրանով նրանք ցանկանում են նվազեցնել հայկական բանակի զգոնությունը: Երրորդ, ապրիլյան իրադարձությունների ժամանակ ադրբեջանական կողմը նշանակալի կորուստներ է ունեցել, և ուժերը վերականգնելու համար ժամանակ է պետք», - նշեց նա:
Մելիք-Շահնազարյանի խոսքով, այժմ Բաքուն իրավիճակային փոփոխությունների կարիք ունի, որոնք հնարավոր չեն առանց պատերազմի: «Հասկանալի է, որ Ադրբեջանի իշխանությունները չեն փոխել իրենց պահանջները և հռետորաբանությունը։ Ադրբեջանին չի հաջողվել լուծել իր առջև դրված խնդիրները, ուստի, պատերազմի վերսկսման վտանգն իրական է», - ասաց նա:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։ -0-
