Ադրբեջանում 17 հայ ռազմագերի կա

ԵՐԵՎԱՆ, 27 հոկտեմբերի./Նովոստի-Արմենիա/. Ադրբեջանում 17 հայ ռազմագերի կա, այսօր կայացած ասուլիսին հայտնել է Հայաստանի քննչական կոմիտեի (ՔԿ) քրեագիտական վարչության պետ Ռաֆայել Վարդանյանը:

«Հաստատված տվյալներով՝ 17, ևս երկուսի մասին տվյալները ճշտվում են»,- նշել է նա:

Վարդանյանը հայտնել է, որ աշխատանքներ են տարվում Մարդու իրավունքների եվրոպական դատարանում հայաստանյան ներկայացուցչության և Պաշտպանության նախարարության ռազմագերների միջգերտեսչական հանձնաժողովի հետ, և տվյալ անձանց նկատմամբ հրատապ միջոցներ կիրառելու, այսինքն` հայ զինծառայողների նկատմամբ հրատապ միջոցներ կիրառելու, որը վերաբերում է բժշկական օգնությանը, չխոշտանգելուն և այլն:

«Արդեն իսկ և՛ ՄԻԵԴ-ում հայաստանյան ներկայացուցչության, և՛ առանձին իրավապաշտպանների կողմից ներկայացվել են դիմումներ, որոնց մի մասը բավարարվել է, և մնացածը գտնվում է ընթացքի մեջ, քննարկման փուլում»,- նշել է նա:

Վարդանյանը չի նշել ադրբեջանցի ռազմագերիների թիվը, որոնք գտնվում են Հայաստանում, բայց նշել, որ հարցաքննվել են երկուսը, ովքեր պահվում են բոլոր միջազգային մարդասիրական իրավունքի նորմերի պահպանմանը համապատասխան, բժշկական օգնության ամենաբարձր մակարդակով ստանում են համապատասխան բժշկական օգնություն, երեքանգամյա սնունդ, և մնացած բոլոր պահանջներն ապահովված են:-0-