Ադրբեջանի և ցեղասպան Թուրքիայի վանդալիզմը. Սուրբ Էջմիածինը վրդովված է Շուշիի Ղազանչեցոց եկեղեցու պղծումից

ԵՐԵՎԱՆ, 14 նոյեմբերի․ /Նովոստի-Արմենիա/․ Հայ Առաքելական եկեղոցում ցավով են տեղեկացանք, որ սույն թվականի նոյեմբերի 9-ի լույս 10-ի գիշերը Արցախում ռազմական գործողությունների դադարեցման ՀՀ, Ադրբեջանի և ՌԴ ղեկավարների միջև ստորագրած հրադադարի համատեղ հայտարարությունից հետո Արցախի Շուշի քաղաք մուտք գործած ադրբեջանցիները պղծել են Շուշիի Ղազանչեցոց Ս․ Ամենափրկիչ եկեղեցին՝ իրենց հետքը թողնելով եկեղեցու արտաքին և ներքին պատերին։ 

Շաբաթ օրը սոցցանցերում հայտնվեցին Շուշիի Սուրբ Ղազանչեցոց եկեղեցու լուսանկարները, որի պատերը ծածկված են իսլամիստական ​​գրություններով: Հիշեցնենք, որ նոյեմբերի 9-ին ստորագրված հայտարարության համաձայն, Արցախի բերդաքաղաք Շուշին անցնում է Ադրբեջանի վերահսկողության տակ: 

«Խստորեն դատապարտում ենք կատարվածը՝ այն որակելով որպես բացահայտ վանդալիզմ ու անհանդուրժողականության դրսևորում։ Չի կարելի թույլ տալ, որ Ադրբեջանը, իր հովանավոր ցեղասպան Թուրքիայի հետևողությամբ, շարունակի մշակութային ցեղասպանության իր քաղաքականությունը, որն արդեն տասնամյակներ շարունակ տարբեր դրսևորումներով իրականացվում է Ադրբեջանում և նրա կազմում գտնվող Նախիջանի Ինքնավար Հանրապետությունում»,- Facebook-յան իր էջում գրել է Մայր Աթոռ Սուրբ Էջմիածնի Տեղեկատվական Համակարգի տնօրեն Վահրամ քահանա Մելիքյանը։ 

Միաժամանակ Հայ Առաքելական եկեղեցին իր կոչն է ուղղել միջազգային հանրությանն ու միջկրոնական և միջեկեղեցական կառույցներին՝ իրենց ձայնը բարձրացնելու և համապատասխան քայլեր ձեռնարկելու՝ դադարեցնելու համար Արցախում ադրբեջանական իշխանությունների կողմից կրոնամշակութային կոթողների ու հուշարձանների նկատմամբ նմանատիպ բարբարոսությունների և հակահայկական տրամադրությունների դրսևորումները։-0-